Nivelet e gripit janë të larta dhe po vazhdojnë të rriten gjatë sezonit 2026, me influencën A që po shfaqet si varianti dominues.
Njerëz në të gjithë vendin, po përballen me valën më të fundit të sëmundjes. Virusi po kontribuon në një numër gjithnjë e më të madh shtrimesh në spital.
Dr. Michael Teng, profesor i asociuar në Divizionin e Alergjisë dhe Imunologjisë në University of South Florida Health, studion mënyrën se si ndërveprimet mes organizmit dhe virusit nxisin sëmundjet virale. Në këtë intervistë, ai u përgjigjet pyetjeve mbi arsyet e rritjes së këtij sezoni dhe çfarë duhet të dinë njerëzit për të qëndruar të shëndetshëm.
Si ndryshon shpërthimi i gripit këtë sezon nga vitet e kaluara dhe kush është më i rrezikuar?
Gripi sezonal shkaktohet nga dy lloje virusi: influenca A dhe B. Brenda influencës A, dy nënlloje dominojnë zakonisht: H1N1 dhe H3N2. Aktualisht, 90 për qind e rasteve të gripit po shkaktohen nga varianti H3N2.
Ndryshimi këtë vit është se varianti qarkullues H3N2 ka disa mutacione që duket se i lejojnë virusit t’i shmanget imunitetit tonë të mëparshëm. Kjo do të thotë se më shumë njerëz do të infektohen dhe do të sëmuren. Nuk duket se ka dallime në simptoma apo në ecurinë e sëmundjes krahasuar me vitet e mëparshme.
Grupet më të rrezikuara mbeten të njëjtat si gjithmonë: fëmijët nën 5 vjeç, personat mbi 65 vjeç dhe ata me sëmundje kronike, si astma apo sëmundjet e zemrës.
A mund të bëhet ende vaksina e gripit dhe a është ajo efektive ndaj varianteve aktuale?
Vaksina e gripit është ende e disponueshme në shumicën e farmacive dhe mbetet e përshtatshme për variantet H1N1 dhe B që po qarkullojnë. Mutacionet e reja në H3N2 ka të ngjarë të kenë ulur efektivitetin e vaksinës kundër këtij varianti, megjithatë ajo pritet të ofrojë ende njëfarë mbrojtjeje nga format e rënda të sëmundjes. Është e rëndësishme të vaksinoheni sa më shpejt, pasi imuniteti ndërtohet brenda rreth dy javësh pas vaksinimit.
Kur duhet kërkuar ndihmë mjekësore për gripin dhe kur mund të trajtohet në shtëpi?
Për shumicën e njerëzve, gripi mund të menaxhohet në shtëpi me barna pa recetë dhe simptomat zakonisht zhduken brenda një jave. Megjithatë, personat me temperaturë shumë të lartë (mbi 40°C), vështirësi në frymëmarrje ose shenja dehidratimi duhet të kërkojnë menjëherë ndihmë mjekësore.
Si mund të reduktohet përhapja e gripit në shtëpi, në punë apo në shkollë?
Mënyrat më të mira për të frenuar përhapjen e gripit janë masat që tashmë i njohim nga SARS-CoV-2: vaksinimi, shmangia e kontaktit të afërt me persona të sëmurë, qëndrimi në shtëpi kur jeni të sëmurë, mbulimi i hundës dhe gojës dhe larja ose dezinfektimi i shpeshtë i duarve. Gripi përhapet përmes pikëzave të mëdha në ajër, ndaj distancimi dhe maskat janë efektive.
A ka diçka tjetër që njerëzit duhet të dinë?
Meqenëse simptomat e gripit ngjajnë me ato të viruseve të tjera respiratore, si SARS-CoV-2, është e rëndësishme të testoheni nëse keni shenja gripi. Ekzistojnë teste të shpejta antigjeni që dallojnë influencën A, influencën B dhe SARS-CoV-2. Testimi i hershëm është veçanërisht i rëndësishëm për personat në rrezik të lartë, pasi barnat antivirale kundër influencës A dhe SARS-CoV-2 janë më efektive brenda dy ditëve të para nga shfaqja e simptomave. / Medicalxpress – Syri.net
