A ju ka ndodhur se pas një nate të gjatë e një gjumi të plotë, ju zgjoheni në mëngjes dhe ndiheni sërish të lodhur? Gjithësecili nga ne mund të përjetojë ditë apo periudha të gjata kohe me zgjime dembele e me ndjesinë e lodhjes së pashpjegueshme.
Shkaqet e lodhjes që ndjejmë kur sapo jemi zgjuar në mëngjes, mund të jenë të ndryshme dhe të ndikuara si nga faktorë psikologjik por edhe fiziologjik. Gjithçka mund të lidhet me çrregullimet e gjumit, në disa raste të tjera nga mungesa e gjumit por edhe në rastet e problemeve të cilësisë së gjumit që ne bëjmë.
Zakonet e stilit të ri të jetesës, stresi, ekspozimi i tepruar ndaj ekraneve dixhitale,tendenca e menjëhershme për të shpenzuar kohë me telefon në dorë në orët e vona të natës, kur kemi luhatje të gjumit duke shpresuar se ai do të na ndihmojë të kalojmë orët pa gjumë ku në të kundërt, ky zakon i dëmshëm, e karikon trurin e njeriut me informacion të panevojshëm duke na bërë alert dhe të na pengojë plotësisht në mundësinë e fjetjes sërish pas një zgjimi të rastësishëm.
Kohët e sotme, mund të themi se njerëzit janë duke iu përshtatur një “higjiene të dëmshme jete” që ndikon drejtpërsëdrejti në cilësinë e jetës, shëndetit dhe gjumit gjithashtu. Jeta sedentare, mungesa e aktivitetit fizik, trysnia e jetës dinamike të kohëve moderne që po jetojmë, stresi, ankthi, konsumi i alkoolit si stimuj të jashtëm që mendojmë se na bëjnë të largojme problemet e jetës së përditshme por që ndikojnë negativisht në cilësinë e gjumit.
Si mund të veprojmë për ta ndihmuar veten në përmirësimin e orëve të gjumit…
Qëndroni sa më shumë të ekspozuar në dritë natyrale dhe ushtroni aktivitet fizik sa të mundeni në mëngjes.
Mbani larg dhomës së gjumit mjetet elektronike.
Shmangni sa më shumë pijet alkoolike/energjike si dhe vaktet e rënda ushqimore para gjumit.
Dhoma ku ju flini, të siguroheni që të jetë e qetë, e errët dhe në temperaturën optimale.
Bëni dremitje të shkurtra dhe siguroni momente relaksi para gjumit në mbrëmje.
