Organizimi i Lojërave Mesdhetare “Prishtina 2030” mund të shndërrohet në një nga projektet më të rëndësishme kombëtare për gjeneratën e ardhshme në Kosovë, duke sjellë përfitime që shkojnë përtej sportit.
Kështu ka deklaruar drejtori ekzekutiv i Këshillit të Investitorëve Evropianë (EIC), Emrush Ujkani, gjatë hapjes së edicionit të parë të platformës “Rruga 2030: Kosova në Skenën Mesdhetare”, me temën “Lidhja e Sportit, Investimeve dhe Rritjes Rajonale”.
Ujkani theksoi se mikpritja e Lojërave paraqet një mundësi për ta lidhur zhvillimin sportiv me investimet, infrastrukturën dhe punësimin.
“Për Kosovën, mikpritja e Lojërave mund të shndërrohet në një projekt kombëtar përcaktues për gjeneratën e ardhshme, duke e shndërruar ambiciet në infrastrukturë, infrastrukturën në investime, dhe investimet në punësim e zhvillim të qëndrueshëm”, tha Ujkani.
Sipas tij, realizimi i këtij vizioni kërkon përgatitje serioze, një plan të qartë veprimi, institucione të forta dhe partneritete të besueshme, ndërsa planifikimi dhe përkushtimi duhet të shtrihen përtej vetë organizimit të Lojërave.
Ai vuri theks të veçantë edhe te përfshirja e qytetarëve, bizneseve, komunave dhe partnerëve ndërkombëtarë në këtë proces.
“Vizoni nuk mund të mbetet vetëm brenda zyrave qeveritare, institucioneve sportive apo sallave të konferencave. Qytetarët duhet të kuptojnë se çfarë mund të thotë Lojërat për Kosovën; të rinjtë duhet të shohin mundësitë; bizneset duhet të njohin potencialin; komunat duhet të kuptojnë rolin e tyre; dhe partnerët tanë ndërkombëtarë duhet të shohin se Kosova po përgatitet në mënyrë kolektive dhe serioze”, theksoi Ujkani.
Ai nënvizoi se bashkëpunimi ndërmjet sektorit publik dhe atij privat është i rëndësishëm për shfrytëzimin e potencialit ekonomik të “Prishtina 2030”, veçanërisht në tërheqjen e investimeve, zhvillimin e infrastrukturës, turizmit dhe krijimin e mundësive të reja për të rinjtë.
Platforma “Rruga 2030” synon të afrojë investitorët, institucionet dhe komunitetin sportiv rreth mundësive që sjell organizimi i Lojërave Mesdhetare në Kosovë.
