Shtetet e Bashkuara po shohin datën 9 prill si një afat të mundshëm për mbylljen e konfliktit me Iranin, në një kohë kur priten zhvillime të reja në drejtim të negociatave mes palëve.
Sipas të përditshmes Yedioth Ahronoth, që citon një zyrtar izraelit të paidentifikuar, Uashingtoni ka vendosur këtë datë si objektiv, duke lënë rreth tre javë kohë për vijimin e operacioneve ushtarake dhe përpjekjeve diplomatike.
Burime të tjera bëjnë të ditur se brenda javës mund të ketë kontakte mes Iranit dhe SHBA-së në Pakistan. Megjithatë, thuhet se SHBA-të nuk kanë ndarë detaje me Izraelin për komunikimet e tyre me kreun e parlamentit iranian, Mohammad Bagher Qalibaf.
Po sipas raportimeve, Izraeli dyshon se Uashingtoni ka nisur tashmë negociata indirekte me Qalibafin, veçanërisht pas deklaratave të Presidentit Donald Trump për kontakte që synojnë përfundimin e luftës.
Nga ana tjetër, vetë Qalibaf i ka mohuar këto pretendime, duke i cilësuar raportimet për bisedime si “lajme të rreme” që, sipas tij, synojnë të ndikojnë tregjet financiare dhe ato të naftës.
Ndërkohë, Trump ka bërë të ditur se ka urdhëruar një pauzë pesë-ditore të sulmeve ndaj objekteve energjetike iraniane, duke përmendur komunikime “të mira dhe produktive” me Teheranin gjatë ditëve të fundit.
Situata në rajon mbetet e tensionuar që prej 28 shkurtit, kur SHBA-të dhe Izraeli nisën një ofensivë të përbashkët ndaj Iranit. Përplasjet kanë shkaktuar deri tani mbi 1,300 viktima, ndërsa përfshihet edhe figura e liderit suprem të atëhershëm, Ali Khamenei.
Si kundërpërgjigje, Irani ka ndërmarrë sulme me dronë dhe raketa ndaj Izraelit dhe vendeve të rajonit që strehojnë baza amerikane, duke shkaktuar dëme në infrastrukturë dhe duke ndikuar edhe në tregjet globale dhe trafikun ajror.
/tiranapost
