Tensioni i Hubble-it është një nga debatet më të nxehta në astronomi. Ai lidhet me një numër të quajtur konstantja e Hubble-it, që përfaqëson shkallën me të cilën universi ynë po zgjerohet. Po, universi ynë i pafund po zgjerohet.
Kemi kohë që e dimë se ky zgjerim është një fakt i kozmosit tonë (dhe se ai po përshpejtohet, por kjo është një histori tjetër). Megjithatë, ende nuk e dimë saktësisht sa shpejt po ndodh ky zgjerim, nuk e dimë me saktësi konstanten e Hubble-it. Dhe kjo nuk është për mungesë përpjekjesh.
Ekzistojnë disa mënyra për të matur konstanten e Hubble-it, por dy janë kryesoret. E para, e përdorur nga teleskopi Hubble, është matja e shpejtësisë me të cilën objektet rreth nesh po largohen. Kjo bëhet duke studiuar objekte specifike dhe të besueshme në qiell, duke llogaritur distancat e tyre dhe duke i kombinuar këto distanca me matjet e zhvendosjes së kuqe (një fenomen ku drita e emetuar nga një objekt që largohet duket më e kuqe). Kjo quhet matje lokale dhe rezulton me një konstante Hubble-i prej rreth 74 kilometrash për sekondë për megaparsek (km/s/Mpc).
Mënyra e dytë është të shikohet në Big Bang, ose më saktë në rrezatimin kozmik të mikrovalëve që e përshkon universin. Duke studiuar këtë rrezatim të lashtë, mund të nxjerrim një vlerë për konstantën e Hubble-it nga fillimi i universit dhe ta përparojmë atë në kohën e sotme, bazuar në ligjet e fizikës. Kjo metodë parashikon një konstantë prej rreth 68 km/s/Mpc.
Këto dy rezultate nuk përputhen, dhe ky është ai që quhet tensioni i Hubble-it. Nëse vëzhgimet nuk përputhen me pritshmëritë, kemi dy mundësi: ose teknikat tona të matjes janë të gabuara, ose ka diçka që nuk e kuptojmë në lidhje me fiziken.
Tani, gjithnjë e më shumë duket se është kjo e fundit. Një studim i ri, i udhëhequr nga Adam Riess, fitues i Çmimit Nobel për Fizikë në 2011, ka konfirmuar matjet lokale të Hubble-it me teleskopin James Webb. Sipas matjeve më të mira deri tani, konstantja e Hubble-it është rreth 73 km/s/Mpc, duke konfirmuar tensionin e Hubble-it dhe duke treguar se ky nuk është thjesht një problem teknik, por një sfidë themelore e fizikës.
Kjo do të thotë se kemi ende një boshllëk në të kuptuarit tonë të bazave të fizikës që përshkojnë gjithë universin. Shkencëtarët do të vazhdojnë të studiojnë këtë problem, dhe kur të zbulojnë përgjigjen, do të kemi në duar një fizikë krejtësisht të re. Sa emocionuese! / Popular Mechanics – Syri.net
