Milingonat filluan të kultivonin 66 milionë vjet më parë si pasojë e asteroidit që zhduku dinozaurët, sugjeron një studim i ri. Sipas shkencëtarëve, kolonitë e milingonave filluan të kultivonin kërpudhat pasi ato përjetuan “një lulëzim”. Asteroidi krijoi kushte ideale që ato të lulëzojnë, pavarësisht se shkaktoi zhdukje masive globale. Studiuesit thonë se shumë kafshë kanë kultivuar ushqimin e tyre shumë kohë para se të ekzistonin njerëzit.
Ted Schultz, kurator i milingonave në Muzeun Kombëtar të Historisë Natyrore të Smithsonian dhe autori kryesor, tha: “Milingonat kanë praktikuar bujqësinë dhe kultivimin e kërpudhave për shumë më gjatë se sa kanë ekzistuar njerëzit. Ne ndoshta mund të mësojmë diçka nga suksesi bujqësor i këtyre milingonave gjatë 66 milionë viteve të fundit.” Ai shtoi: “Zhdukjet mund të jenë katastrofa të mëdha për shumicën e organizmave, por në fakt mund të jenë pozitive për të tjerët. Në fund të periudhës së Kretakut, dinozaurët nuk ia dolën shumë mirë, por kërpudhat përjetuan një kulm”.
Impakti i asteroidit mbushi atmosferën me pluhur dhe mbeturina, të cilat bllokuan diellin dhe penguan fotosintezën për vite, duke zhdukur afërsisht gjysmën e të gjitha specieve bimore në planet. Megjithatë, kjo kohë ishte ideale për kërpudhat. Sipas studiuesve, shumë nga kërpudhat që u rritën gjatë kësaj kohe ka të ngjarë të ushqeheshin me mbeturinat e gjetheve të kalbura, duke i sjellë ato në kontakt të ngushtë me milingonat.
Këto insekte shfrytëzuan kërpudhat e shumta për ushqim dhe vazhduan të mbështeteshin tek ai ndërsa jeta u rikuperua nga zhdukja e specieve. Studimi, i botuar në revistën Science, zbuloi gjithashtu se u deshën gati 40 milionë vjet të tjera që milingonat të zhvillonin bujqësi më të lartë.
Kur milingonat nxorën kërpudhat nga pyjet e lagështa dhe në zona më të thata, kërpudhat e izoluara u varën plotësisht nga milingonat për të mbijetuar në kushte të thata, me milingonat që në thelb i zbutën këto kërpudha në të njëjtën mënyrë që njerëzit i zbutën të korrat.
Milingonat gjetheprerëse janë ndër ato që praktikojnë strategjinë më të avancuar, të njohur si bujqësia e lartë. Këto milingona mbledhin pjesë të bimësisë së freskët për të siguruar ushqim për kërpudhat e tyre, të cilat nga ana e tyre rritin ushqim për milingonat.
Dr. Schultz ka kaluar 35 vjet duke studiuar marrëdhëniet evolucionare mes milingonave dhe kërpudhave, dhe ndër vite ekipi i tij ka mbledhur mijëra mostra gjenetike të milingonave dhe kërpudhave nga të gjithë tropikët.
Për studimin, studiuesit përdorën mostra për të mbledhur të dhëna gjenetike për 475 lloje të ndryshme kërpudhash, 288 prej të cilave kultivohen nga milingonat, dhe 276 lloje të ndryshme të milingonave, 208 prej të cilave kultivojnë kërpudha. Duke përdorur këto të dhëna, shkencëtarët ishin në gjendje të përcaktonin se kur milingonat filluan të përdornin disa kërpudha. Studimi zbuloi se milingonat dhe kërpudhat janë ndërthurur për 66 milionë vjet, që nga koha kur një asteroid goditi Tokën në fund të periudhës të Kretakut. / Independent – Syri.net
