Një shpërthim me lëndë plasëse, dyshohet tritol, ka ndodhur rreth orës 01:40 në një biznes përgjatë rrugës kryesore në lagjen “Kastriot” në Fier.
Gazetarja Laureta Roshi duke iu referuar burimeve nga policia raportoi për RTSH se lënda plasëse ishte vendosur në derën e jashtme të një subjekti që tregtonte syze, në pronësi të shtetasit A. K.
Nga shpërthimi janë shkaktuar dëme materiale, ndërsa disa biznese fqinje kanë pësuar plasaritje. Në vendngjarje kanë mbërritur forcat e Policisë, të cilat kanë kryer veprimet hetimore për zbardhjen e rrethanave të ngjarjes dhe identifikimin e personave përgjegjës.
Policia ka sekuestruar edhe pamjet e kamerave të sigurisë për të bërë të mundur identifikimin e autorëve.
