Lavdije Murati është pedikurja shqiptare, e cila edhe gjatë Euro 2024 u kujdes për trajtimin e këmbëve të futbollistëve të kombëtares së Italisë.
Lavdije Murati është një trajtuese e këmbëve të lojtarëve te skuadra gjermane Borussia Dortmund, transmeton albinfo.ch.
Ajo gjatë zhvillimit të kampionatit Euro 2024 ishte trajtuese e këmbëve edhe për futbollistët italianë.
“Ishin të gjithë vërtet shumë të këndshëm. Më kanë lënë përshtypje shumë të mirë. Ishin të informuar për punën time. Nuk kisha nevojë t’u tregoja se kush jam dhe çfarë bëj”, thotë Lavdija. Ajo është nga Kosova, por jeton prej kohësh në Gjermani.
“Të gjithë lojtarët dhanë nga një autogram për vajzën time, Alarën”, tregon Lavdija, e cila për shumë vjet është e angazhuar te Dortmundi.
“Nuk e kam menduar se do të isha e përfshirë në Evropian, aq më tepër të trajtoja këmbët e lojtarëve të Italisë. Më ka kontaktuar një zyrtar i UEFA-s. Më pas më kontaktuan edhe nga Dortmundi dhe më thanë t’i lë punët në klub dhe të shkoj për t’i trajtuar këmbët e lojtarëve të Italisë”.
Kujtojmë se Italia e ka kaluar me sukses vetëm një pjesë të rrugës në Evropianin që u mbajt në Gjermani, duke u eliminuar pastaj nga Zvicra. /Albinfo.ch
