7
“Dieta detox nuk ekziston: nuk ka asgjë për të pastruar, trupi ynë është një makineri e krijuar për t’u mbajtur e shëndetshme në mënyrë të pavarur.” Kështu përgjigjet Dr. Mattia Pieri, nutricionist dhe coach ushqimor.
E megjithatë, kur kthehemi në jetën e zakonshme të përditshme, shpesh mbetet një ndjenjë rëndese dhe fryrjeje… “Sepse gjatë festave, ose më herët, kemi tepruar apo nuk kemi pasur sjellje të matura që do të ndihmonin në ruajtjen e shëndetit të mirë të traktit gastrointestinal,” shpjegon Pieri. “Në fjalorin ushqimor nuk ekziston folja ‘detoksifikoj’. Shqetësimet e vogla apo të mëdha që bartim në fillim të vitit të ri janë pasojë e zakoneve të këqija ushqimore që, sigurisht, nuk shfaqen magjishëm vetëm gjatë festave. Ato duhet të korrigjohen në radhë të parë nga pikëpamja psikologjike.”
Çfarë do të thotë saktësisht kjo?
“Shumë prej pacientëve të mi i qasen periudhës së festave sikur të ishte një moment ndëshkimi që do të prishte të gjitha planet ushqimore ose do të zhdukte rezultatet e arritura duke ndjekur një regjim të balancuar ushqimor,” sqaron Pieri. “I ftoj gjithmonë të relaksohen dhe t’i shohin festat si një moment pushimi nga gjithçka, pra si një frymëmarrje e lirë, ku mund të shijojnë shijen e shoqërisë.
Qendra e gjithçkaje është gjithmonë shëndeti psikofizik: nëse unë i qasem ushqimit plot me ndjenja faji, çdo kalori që do të konsumoj do të më bëjë keq. Gjithmonë sugjeroj përdorimin e maturisë dhe moderimit, sidomos në tryezë: të provosh gjithçka, të mos privohesh nga diçka që të pëlqen, por ta bësh këtë me porcione të përshtatshme, jo të tepërta, ndihmon për të ngrënë më mirë. Dhe mbi të gjitha, të kuptosh si funksionojmë si organizëm në përgjithësi, por edhe në nivel personal: të kuptosh çfarë më bën mirë në tryezë nxit një qasje të ekuilibruar dhe të ndërgjegjshme ndaj ushqimit. Të ulesh në tryezë nuk mund të shihet si një kërcënim.”
Disa këshilla për të ruajtur ose rikthyer një gjendje optimale psikofizike dhe shëndet të mirë gastrointestinal:
Hidratimi: Pini të paktën 2 litra ujë në ditë për të ndihmuar funksionimin e vazhdueshëm dhe të duhur të organeve vitale.
Respektimi i raportit të duhur të ushqyesve në vakt: Vakti duhet të jetë sa më i ekuilibruar, duke respektuar raportin e ushqyesve tashmë të përcaktuar. Eliminimi i karbohidrateve, teprimi me fruta dhe perime, ose rritja e tepërt e konsumit të proteinave duke menduar se mund të dobësohemi më shpejt është kundërproduktive në periudhë afatgjatë.
Aktiviteti fizik: Mos ndërprisni aktivitetin fizik gjatë festave; përkundrazi, përfitoni nga koha e lirë për të shtuar lëvizjen, qoftë ecje, kardio ose stërvitje me peshë. Qëllimi është përmirësimi i mirëqenies psikofizike, jo vetëm djegia e kalorive.
Probiotikët dhe enzimat: Për të përmirësuar tretjen dhe për të ruajtur balancën e florës bakteriale të zorrëve, mund të konsiderohet përdorimi i probiotikëve dhe enzimave.
ks
