Termat “era e të moshuarve” dhe “era e Ozempic” janë bërë virale së fundmi në rrjetet sociale, duke hapur një debat të ri mbi aromën që lëshon trupi i njeriut dhe ndikimin që dieta ushqimore ka në këtë aspekt.
Ekspertët pohojnë se ushqimet që konsumojmë luajnë një rol të rëndësishëm në mënyrën se si nuhasim ne dhe të tjerët rreth nesh, duke ndikuar jo vetëm djersën, por edhe frymëmarrjen dhe shëndetin e përgjithshëm metabolik.
“Disa ushqime ndikojnë në aromën e trupit më shumë se të tjerat,” u shpreh për Fox News Digital dietologia Erin Palinski-Wade nga New Jersey. Sipas saj, bakteri i lëkurës dhe mënyra se si ky zbërthen djersën është një faktor kyç që përcakton erën e trupit të çdo individi.
Midis ushqimeve që ndikojnë më shumë përmenden peshku, për shkak të përbërjes së kolinës që në raste të rralla kthehet në trimetilaminë me erë peshku; perimet kryqëzore si brokoli, lakra dhe lulelakra që çlirojnë acide sulfurike; si dhe erëzat pikante si kerri apo kumini që përmbajnë komponime të paqëndrueshme që përthithen dhe lëshohen përmes gjëndrave të djersës.
Gjithashtu, edhe konsumi i mishit të kuq ndikon në aromën e trupit, pasi proteinat që çlirohen përzihen me bakteret e lëkurës dhe krijojnë një erë më të fortë. Por, sipas Palinski-Wade, ndryshimet dietike mund të përmirësojnë dukshëm situatën.
Ajo rekomandon rritjen e konsumit të ujit, frutave dhe perimeve të freskëta si mollët dhe zarzavatet me gjethe jeshile, si dhe ushqimeve që mbështesin mikrobiomën e zorrëve, si kosi apo çaji jeshil. “Mbajtja e higjienës personale, larja e rregullt me sapun antibakterial dhe përdorimi i veshjeve që lejojnë frymëmarrjen janë gjithashtu hapa të rëndësishëm”, theksoi ajo.
Përveç dietës, Palinski-Wade nënvizon rëndësinë e gjumit cilësor, reduktimit të stresit dhe aktivitetit fizik për të mbështetur shëndetin metabolik dhe, si rrjedhojë, për të përmirësuar aromën e trupit në përgjithësi.
