Profesori universitar, Nexhmedin Spahiu, ka vlerësuar se Kosova pas marrëveshjeve që ka arritur në fushën e sigurisë me Shtetet e Bashkuara të Amerikës, Shqipërinë dhe Kroacinë, ta bëjë edhe me Bullgarinë.
Spahiu ka thënë se kjo do të ishte e rëndësishme nga aspekti politik dhe psikologjik, ku ka përmendur reagimin e presidentit serb Vuçiq, pas marrëveshjes të së martës në fushën e mbrojtjes mes Kosovës, Shqipërisë dhe Kroacisë.
“Ftoj Qeverinë dhe Ministrin e Mbrojtjes që të bëjë përpjekëje që në këtë marrëveshje ta inkuadrojë edhe Bullgarinë, sepse kjo ka rëndësi të madhe politike dhe psikologjike në radhë të parë, e kemi parë edhe reagimin e Vuçiqit dhe prandaj kjo është më se nevojshme të krijohet”, ka thënë Spahiu.
Duke folur për marrëveshjen e së martës, Spahiu ka thënë se kjo i ofron siguri Kosovës, pasi ajo do të ishte caku i parë i një sulmi nga Serbia.
“Në rrafshin politik është krijimi i një potkoi rreth Serbisë i cili nuk e siguron vetëm Kroacinë dhe Shqipërinë, por e siguron në radhë të parë Kosovën, sespe Kosova është caku i parë i sulmit të Serbisë në qoftë se ajo fillon me i tregu muskujt pas ndryshimeve gjeopoltike”, ka vlerësuar Spahiu.
Ditë më parë Qeveria e Kosovës ka miratuar vendimin për marrëveshje me Shtetet e Bashkuara të Amerikës në fushën e sigurisë. E sipas Spahiut këto dy marrëveshje tregojnë një frikë për largimin e ShBA-së nga NATO.
“Kjo cfarë ka ndodhur sot dhe nënshkrimi i marrëveshjes mes Shteteve të Bashkuara të Amerikës dhe Kosovës në fushën e sigurisë, tregon njëfarë droje për largimin e ShBA-së nga NATO. Nëse kjo ndodhë, kjo tregon që ShBA ka një interes strategjik në Kosovë edhe kjo marrveshje mund të shihet si parapërgatitje strategjike e ndryshimeve gjeopolitike”, ka thënë Spahiu.
