Siç thotë edhe shprehja e vjetër, pret me vite për një studim mbi stetoskopët e mundësuar nga inteligjenca artificiale dhe pastaj ja, të vijnë të dy pothuajse njëherësh.
Të botuara brenda një jave nga njëri-tjetri në fillim të shkurtit, të dy punimet tregojnë se si inteligjenca artificiale mund të paktën të plotësojë ose edhe t’i tejkalojë mjekët, kur bëhet fjalë për zbulimin e hershëm potencialisht shpëtues të sëmundjeve të zemrës.
Ky hulumtim është vetëm i fundit, që sugjeron se ndoshta mjeti më i njohur i lidhur me mjekët, është gati të rikrijohet për epokën e inteligjencës artificiale.
“Inteligjenca artificiale identifikoi saktë 98% të pacientëve me stenozë të rëndë aortale, forma më e zakonshme e sëmundjes së valvulave që kërkon ndërhyrje kirurgjikale, dhe 94% të atyre me regurgitim të rëndë mitral, ku valvula e zemrës nuk mbyllet plotësisht dhe gjaku rrjedh prapa përmes valvulës”, tha Universiteti i Kembrixhit, pasi një ekip studiuesish analizoi tingujt e zemrës nga gati 1,800 pacientë.
Ekipi i Kembrixhit përdori një algoritëm të “trajnuar” për të zbuluar sëmundjen e valvulave, e cila shpesh nuk zbulohet derisa të vërë në rrezik jetën e pacientit.
“Teknologjia, e cila funksionon me stetoskopë digjitalë, i tejkaloi mjekët e përgjithshëm në zbulimin e sëmundjeve të valvulave, dhe mund të përdoret si një mjet i shpejtë shqyrtimi në kujdesin parësor”, tha universiteti.
“Auskultacioni kardiak (dëgjimi duke përdorur një teleskop) është një aftësi e vështirë dhe përdoret gjithnjë e më pak në operacionet e ngarkuara të mjekëve të përgjithshëm”, tha Anurag Agarwal nga Departamenti i Inxhinierisë i Kembrixhit, gjetjet e ekipit të të cilit u botuan më 10 shkurt në npj Cardiovaskular Health.
Pesë ditë më parë, European Heart Journal publikoi gjetjet e një ekipi shkencëtarësh dhe mjekësh me bazë në SHBA, të cilat tregonin se një stetoskop digjital i mundësuar nga inteligjenca artificiale, “më shumë se dyfishon ndjeshmërinë për zbulimin e sëmundjeve të valvulave të zemrës nga mesatarja deri në të rënda”, krahasuar me një pajisje tradicionale.
“Stetoskopi me inteligjencë artificiale tregoi ndjeshmëri, dukshëm më të lartë në zbulimin e modeleve të tingujve të zemrës që tregojnë sëmundje valvulare të zemrës, me ndjeshmëri 92.3% krahasuar me 46.2% me stetoskopin tradicional”, tha në një deklaratë Shoqata Evropiane e Kardiologjisë, botuesi i revistës.
“Shpresojmë që kjo teknologji do t’u lejojë pacientëve akses më të shpejtë në një ekokardiogramë për të diagnostikuar zyrtarisht gjendjen e tyre dhe më pas për të aksesuar trajtimin më shpejt”, tha studiuesja kryesore Rosalie McDonough.
Studime të tjera të ngjashme të kryera që nga viti 2023, përfshirë dy nga Klinika Mayo në SHBA, tregojnë se stetoskopët e mundësuar nga inteligjenca artificiale i tejkalojnë mjekët kur bëhet fjalë për zbulimin e problemeve të zemrës që lidhen me shtatzëninë./ DPA News.
