Moda e vjeshtës dhe dimrit sjell disa rikthime dhe tendenca të reja. Këtë sezon, modelet e vogla me kuadrate, efekti i lëkurës së krokodilit dhe jakat me pelush janë ndër elementet më të spikatura. Ndërkohë, veshjet me stil biznesi po dalin nga zyrat dhe po përdoren gjithnjë e më shumë në përditshmëri.
Çfarë është e re këtë vjeshtë dhe dimër?
Një nga tendencat më të dukshme është efekti krokodil, që shfaqet në pallto, funde, xhaketa, këpucë dhe çanta. Elie Saab e përdor në veshje me shkëlqim, ndërsa Alaïa e kombinon me një fustan të kuq elegant. Për një pamje më të thjeshtë, mund të zgjidhni një çantë ose këpucë me këtë efekt.
Këshilla kryesore është të mos e teproni. Zakonisht mjafton një model me motiv kafshësh në një veshje. Sipas stilistes Dunja Heß, modelet me motivet e zebrës dhe leopardit nuk duhen kombinuar me njëra-tjetrën dhe as me efektin krokodil. Një palë xhinse klasike me një çantë prej materiali që imiton lëkurën e krokodilit është një zgjedhje moderne, por jo e ekzagjeruar.
Një tjetër tendencë e fortë janë jakat me pelush sintetik, që shfaqen në xhaketa, bomber, pallto dhe veshje të tjera. Kjo tendencë ishte e pranishme edhe sezonin e kaluar dhe vazhdon të jetë në modë.
Po ashtu, kuadratet janë rikthyer fuqishëm. Ndryshe nga këmishat klasike me kuadrate, këtë herë dominojnë modelet më të vogla dhe kombinimet më të veçanta. Mund të vishni, për shembull, pantallona me kuadrate me një xhaketë të madhe me të njëjtin motiv. Për një pamje elegante, madhësia e kuadrateve mund të jetë e njëjtë, por këtë sezon lejohen edhe kombinimet e kuadrateve të mëdha me të vogla. Në këtë rast, ngjyrat duhet të jenë në harmoni.
Nga zyra në përditshmëri
Veshjet me pamje biznesi nuk janë më vetëm për takimet në zyrë. Bluzat me vija të holla, xhaketat me shpatulla të gjera dhe pantallonat klasike janë gjithnjë e më të zakonshme edhe në kohën e lirë.
“Biznesi dhe stili casual po përzihen gjithnjë e më shumë”, thotë DunjaHeß. Një xhaketë elegante mund të vishet në mbrëmje, ndërsa fundi i ngushtë mund të përdoret larg zyrës. Pantallonat e gjera me vija të holla mund të kombinohen edhe me një T-shirt të bardhë dhe atlete.
Çfarë pantallonash janë në modë?
Këtë sezon dominojnë pantallonat e gjera, përfshirë modelet me formë të rrumbullakët. Në rikthim janë edhe xhinset me prerje të drejtë, si modeli klasik Levi’s 501.
Xhinset e drejta mund të kombinohen me një këmishë dhe xhaketë xhinsi, për një pamje “denim” nga koka te këmbët. Ato zakonisht vishen me bel të lartë dhe duken moderne me një xhaketë oversize dhe një bluzë të ngushtë që thekson belin.
Edhe rripat me logo dhe tokëza të mëdha, sidomos në ngjyrë ari, po rikthehen në modë.
Çfarë po del nga moda?
Ngjyrat neon dhe tonet shumë të ndezura po largohen. Në vend të tyre, këtë sezon dominojnë nuancat e grisë, të kombinuara edhe me të verdhën e butë “gjalpë”.
Një tjetër ngjyrë kryesore është kafeja çokollatë, e cila mund të vishet edhe në një pamje monokromatike.
Për ata që preferojnë ngjyra më të forta, rekomandohen tonet e kuqe të errëta, veçanërisht bordo, e kuqja qershi dhe nuancat e kumbullës.
