Empatia ka qenë gjithmonë një nga karakteristikat më të rëndësishme në vendin e punës.
Sot, megjithatë, ajo po merr një kuptim edhe më të thellë dhe po shndërrohet në prioritet për ata që synojnë të mbajnë pozicione drejtuese.
Shfaqja e empatisë ka ndikim pozitiv në psikologjinë individuale, por kërkimet e reja tregojnë se rëndësia e saj shtrihet në të gjithë funksionimin e një organizate. Personat që marrin role drejtuese dhe pozita autoriteti duhet të kombinojnë një sërë aftësish për të krijuar një mjedis qetësie, angazhimi dhe mirëqenieje në punë dhe natyrisht, për të përmirësuar performancën e punonjësve. Në krye të kësaj liste qëndron empatia.
Rritja e stresit dhe çrregullimet e shëndetit mendor
Në thelb, “empatia” është përpjekja për ta vendosur veten në vendin e tjetrit dhe për ta parë botën nga perspektiva e tij.
Rëndësia në rritje e empatisë lidhet drejtpërdrejt me ndryshimet rrënjësore që solli pandemia në mënyrën e jetesës dhe të punës. Nivelet dhe format e stresit u rritën ndjeshëm, duke ndikuar në disa fusha kyçe, siç janë shëndeti mendor, jeta personale dhe klientela.
Shëndeti mendor – Një studim i gjerë për kompaninë statistikore Qualtrics tregoi se 42% e njerëzve përjetojnë aktualisht një problem të shëndetit mendor. Më konkretisht, 67% raportojnë rritje të stresit, 57% përjetojnë çrregullime të ankthit, ndërsa 54% ndihen të rraskapitur emocionalisht.
Jeta personale – Hulumtime mbi shëndetin e punonjësve kanë treguar se stresi i lidhur me punën ul cilësinë e gjumit. Një studim nga Universiteti i Illinois zbuloi se kur punonjësit marrin komente apo email-e të pahijshme, ata priren ta transferojnë negativitetin edhe në jetën personale, veçanërisht në marrëdhënien me partnerin. Ndërkohë, një kërkim nga Universiteti Carleton në Kanada evidenton se mungesa e kufijve të shëndetshëm në punë i bën punonjësit të ndihen më pak të aftë si në profesion, ashtu edhe në rolin e tyre si prindër.
Performanca dhe përvoja e klientit – Një studim i publikuar në Academy of Management Journal konstaton se përballja me sjellje të pahijshme në punë ul performancën dhe gatishmërinë për të ndihmuar të tjerët. Po ashtu, një studim nga Universiteti Georgetown tregoi se sjellja e pahijshme në ambientin e punës ndikon negativisht edhe në përvojën e klientëve.
Rezultatet pozitive
Në kohë të vështira, kur punonjësit përballen me lodhje, mungesë motivimi apo ndjesinë se puna nuk i përmbush, empatia mund të shndërrohet në një mjet kyç për përmirësimin e klimës organizative dhe të rezultateve.
Një studim i ri me 889 punonjës nga organizata globale jofitimprurëse Catalyst, e fokusuar në pozicionin e grave në tregun e punës, nxori në pah ndikimin e fortë të empatisë.
Kur gratë raportuan se trajtoheshin me respekt dhe qetësi, ato kishin më shumë gjasa të mendonin në mënyrë të hapur dhe të sillnin ide inovative. 76% e atyre që përjetonin sjellje empatike shfaqnin më shumë përkushtim ndaj punës, krahasuar me 32% të atyre që përballeshin me mungesë mirësjelljeje.
Mbi 50% e grave deklaruan se kishte më pak gjasa të mendonin largimin nga një kompani që respektonte kushtet e jetës së tyre. 50% e pjesëmarrëseve që punonin në mjedise pa përjashtime ndiheshin më të sigurta dhe komode, ndërsa vetëm 17% e atyre që raportuan diskriminim ndiheshin të sigurta.
86% e grave që ndjenin empati nga drejtuesit e tyre deklaruan se arrinin më mirë të balanconin jetën profesionale dhe personale.
Nivelet më të larta të dhembshurisë dhe empatisë nga ana e drejtuesve u shoqëruan me më pak probleme psikologjike tek punonjësit.
Empatia, pjesë e natyrës njerëzore
Empatia nuk është një koncept i ri.
Një studim nga Universiteti Lund tregoi se fëmijët dy-vjeçarë shfaqin shenja empatie dhe kuptimi të gjendjes emocionale të tjetrit. Ndërkohë, kërkime nga Universiteti i Virxhinias zbuluan se kur një mik apo i afërm ndodhet në rrezik apo përjeton një traumë, në tru aktivizohen të njëjtat zona si kur rrezikohemi vetë. Këto gjetje e konfirmojnë empatinë si një element themelor të sjelljes njerëzore, si në jetën personale ashtu edhe në atë profesionale.
Ekzistojnë dy mënyra bazë për të ushtruar empatinë, të mendoni se çfarë do të mendonit po të ishit në vendin e tjetrit dhe të reflektoni se si do të ndiheshit në situatën e tij. Megjithatë, kjo nuk mjafton.
Një drejtues i suksesshëm duhet të shprehë shqetësimet e tij, por edhe të dëgjojë me vëmendje reale ato të punonjësve.
Nuk kërkohet të jeni ekspert i shëndetit mendor për të treguar empati. Mjafton një qasje njerëzore, e bazuar në respekt. Bëni pyetje që tregojnë interes të sinqertë dhe kushtojini vëmendje të plotë përgjigjeve.
