39
Beqarët mund të kenë rreth 80% më shumë gjasa të vuajnë nga depresioni sesa të martuarit, sipas një studimi të ri.
Rreziku i depresionit për beqarët mund të jetë më i lartë tek meshkujt dhe ata me më shumë arsimim, zbuloi gjithashtu studimi i publikuar në revistën Nature Human Behavior.
Shkencëtarët besojnë se gjetjet mund t’i ndihmojnë ata të identifikojnë njerëzit që janë në rrezik më të lartë për këtë gjendje.
Ata argumentojnë se shkalla më e ulët e depresionit në mesin e çifteve të martuara mund të jetë për shkak të faktit se ata janë në gjendje të mbështesin njëri-tjetrin shoqërisht, të kenë akses më të mirë në burimet financiare dhe të ndikojnë pozitivisht në mirëqenien e njëri-tjetrit.
Siç raportohet nga Independent, studimi shqyrtoi të dhënat nga më shumë se 100,000 njerëz në shtatë vende: SHBA, Britani e Madhe, Meksikë, Irlandë, Kore e Jugut, Kinë dhe Indonezi, gjatë një periudhe pasuese prej katër deri në 18 vjet. Siç vërejnë autorët e tij:
“Analiza jonë ndërkombëtare sugjeron se individët beqarë mund të jenë në rrezik më të madh për depresion dhe çdo përpjekje për të zbutur këtë rrezik duhet të marrë parasysh rolin e kontekstit kulturor, gjinisë, nivelit arsimor dhe përdorimit të substancave.”
Sipas Organizatës Botërore të Shëndetësisë, rreth 280 milionë njerëz në mbarë botën vuajnë nga depresioni – rreth 5% e popullsisë së rritur të botës. Disa nga shenjat e depresionit mund të përfshijnë ndjenjën e trishtimit, të pashpresë dhe humbjen e interesit për gjërat që dikur na pëlqenin.
Studimi i ri zbuloi se të qenit beqar lidhet me një rrezik 79% më të lartë për të zhvilluar simptoma depresive në krahasim me ata që janë të martuar. Njerëzit që ishin të divorcuar ose të ndarë kishin një rrezik 99% më të lartë për të përjetuar simptoma depresive, dhe njerëzit që ishin të ve kishin një rrezik 64% më të lartë se njerëzit që ishin të martuar.
Sipas gjetjeve, beqarët në vendet perëndimore kishin një rrezik më të lartë të depresionit sesa homologët e tyre në vendet lindore.
