Një studim i ri ka zbuluar se disa prej medikamenteve më të përdorura për humbje peshe mund të kenë një efekt të papritur: uljen e varësisë nga alkooli dhe substanca të tjera narkotike.
Sipas studimi të publikuar në revistën shkencore The BMJ, barnat e njohura si agonistë të receptorit GLP-1, që përdoren zakonisht për trajtimin e diabetit të tipit 2 dhe obezitetit, mund të reduktojnë ndjeshëm rrezikun e zhvillimit të varësisë nga substanca si alkooli, nikotina, kanabisi, kokaina dhe opioidet.
Studimi me mbi 600 mijë persona
Në kërkim morën pjesë më shumë se 600 mijë veteranë amerikanë me diabet të tipit 2, të cilët u ndoqën për rreth tre vite. Studiuesit krahasuan pacientët që përdornin barna GLP-1 me ata që merrnin trajtime të tjera për diabetin.
Rezultatet treguan se personat që përdornin këto medikamente kishin:
– 14% më pak gjasa të zhvillonin një çrregullim të ri të varësisë nga substancat
– 31% më pak vizita emergjente në spital
– 39% më pak raste mbidoze
– dhe deri në 50% rrezik më të ulët vdekjeje tek ata që tashmë kishin probleme me varësinë.
Si ndikojnë këto barna në tru
Shkencëtarët besojnë se këto medikamente ndikojnë në sistemin e shpërblimit të trurit, i cili lidhet me ndjenjën e kënaqësisë dhe dëshirës për substanca si alkooli apo droga. Duke modifikuar këto mekanizma biologjikë, barnat mund të reduktojnë dëshirën për konsum të këtyre substancave.
Megjithatë, ekspertët theksojnë se studimi është observacional, që do të thotë se tregon lidhje mes përdorimit të barnave dhe uljes së varësisë, por nuk provon përfundimisht se këto medikamente janë shkaku i drejtpërdrejtë i këtij efekti. Për këtë arsye nevojiten prova klinike më të gjera për të konfirmuar rezultatet.
Përtej humbjes së peshës
Barnat GLP-1, të përdorura gjithnjë e më shumë në botë për trajtimin e obezitetit, janë bërë të njohura kryesisht për efektin e tyre në uljen e oreksit dhe peshës trupore. Studiuesit tani po shqyrtojnë mundësinë që këto medikamente të kenë edhe përfitime të tjera shëndetësore, përfshirë trajtimin e varësive.
Megjithatë, specialistët paralajmërojnë se trajtimet ekzistuese për varësinë mbeten thelbësore dhe se këto barna nuk duhet të konsiderohen ende si një terapi e re standarde për këtë problem.
Studiuesit shpresojnë që kërkimet e ardhshme dhe provat klinike të përcaktojnë më qartë nëse këto medikamente mund të përdoren një ditë si pjesë e trajtimit për varësinë nga alkooli dhe drogat.
