Vitamina D, e quajtur shpesh “vitamina e diellit” sepse trupi e prodhon përmes rrezeve të diellit, gjendet edhe në ushqime si peshku yndyror, mishi i kuq dhe e verdha e vezës.
Megjithatë, për shkak të mungesës së orëve të dritës gjatë dimrit në Mbretërinë e Bashkuar, rreth një në gjashtë persona kanë nivele të vitaminës D nën rekomandimet qeveritare.
Dihet prej kohësh se vitamina D është thelbësore për shëndetin e kockave dhe muskujve, por një studim i ri i udhëhequr nga Universiteti i Surrey-t ka gjetur një lidhje mes mungesës së vitaminës D dhe rrezikut për shtrim në spital nga infeksionet e frymëmarrjes.
Në studimin, të botuar në American Journal of Clinical Nutrition, studiuesit sugjerojnë se personat me mungesë të theksuar të vitaminës D kishin më shumë gjasa të shtroheshin në spital për sëmundje të frymëmarrjes si bronkiti dhe pneumonia.
Sipas autores kryesore Abi Bournot nga Universiteti i Surrey-t, vitamina D mendohet se ka “veti antibakteriale dhe antivirale” që ndihmojnë në uljen e rrezikut të infeksioneve të rrugëve të frymëmarrjes.
“Ky studim sjell të dhëna konkrete që e mbështesin këtë teori. Pavarësisht rëndësisë së saj për shëndetin e përgjithshëm, shumë njerëz kanë mungesë dhe nuk arrijnë dozën e rekomanduar prej 10 mikrogramësh vitaminë D në ditë,” shtoi ajo.
Për studimin, hulumtues nga Universitetet e Surrey-it, Oksfordit dhe Reading-ut analizuan të dhënat e rreth 36,000 të rriturve në Mbretërinë e Bashkuar për të parë se si nivelet e vitaminës D ndikojnë në shtrimet në spital për infeksione të frymëmarrjes.
Studime të mëparshme e kanë lidhur mungesën e vitaminës D me rrezik më të lartë për Covid, por në këtë rast u analizuan si sëmundjet bakteriale ashtu edhe ato virale, si gripi, pneumonia dhe bronkiti.
Rezultatet treguan se personat me mungesë të rëndë të vitaminës D, e përcaktuar si nivel nën 15 nmol/L në gjak, kishin 33% më shumë gjasa të shtroheshin në spital për infeksione të frymëmarrjes, krahasuar me ata që kishin nivele optimale mbi 75 nmol/L.
Për çdo rritje prej 10 nmol/L të vitaminës D në gjak, numri i shtrimeve në spital për sëmundje të frymëmarrjes u ul me 4%.
Autorja e studimit, dr Andrea Darling nga Universiteti i Surrey-t, tha se infeksionet e frymëmarrjes janë një “kërcënim i madh për shëndetin publik”, pasi mund të çojnë në shtrime në spital dhe të rëndojnë shërbimet shëndetësore. Ajo shpjegoi se konsumimi i ushqimeve të pasuruara me vitaminë D mund ta ulë këtë rrezik dhe të lehtësojë presionin mbi NHS-në./The Independent – Syri.net
