Vendimi i Gjykatës Themelore për t’i caktuar 30 ditë paraburgim këngëtarit Besart Kelmendi, i njohur për publikun si Gjesti, ka shkaktuar një “tërmet” të vërtetë reagimesh në estradën shqiptare.
Ndërsa institucionet e drejtësisë po vijojnë me procedurat e tyre ligjore, komuniteti i artistëve ka nisur të rreshtohet hapur në mbështetje të kolegut të tyre.
Reperja e njohur Tayna ka zgjedhur të reagojë publikisht përmes një postimi emocionues në Instagram, duke u përpjekur t’i tregojë publikut anën tjetër të medaljes – atë që shpesh mbetet e padukshme pas kamerave.
Duke ndarë një fotografi të ngrohtë ku dyshja shihen duke u përqafuar në skenë, Tayna ka dhënë një mesazh të thellë. Ajo theksoi se veprimet apo “gabimet” e artistëve shpesh gjykohen ashpër nga jashtë, por pak njerëz e kuptojnë zhgënjimin dhe padrejtësitë profesionale që i çojnë ata drejt atij reagimi.
“Shumë njerëz e gjykojnë reagimin, por pak e dinë çfarë e shtyn një artist deri aty. Kur puna jote, zëri yt dhe djersa jote nuk respektohen, dhimbja bëhet revoltë,” – ka shkruar Tayna, duke lënë të kuptohet se prapaskenat e industrisë muzikore mund të jenë tejet të vështira.
Për Taynën, ky nuk është thjesht një problem individual i Gjestit, por një betejë që preket nga shumë krijues. Ajo bëri një thirrje të hapur për solidaritet mes artistëve në momente të tilla kritike. “Artistët meritojnë drejtësi për krijimet e tyre. Në fund të ditës ne kalojmë sfida të ngjashme… dhe këto janë momentet kur bashkë duhet të mbështesim njëri-tjetrin,”përfundoi ajo.
Ky reagim i Taynës dëshmon se, pavarësisht telasheve aktuale me drejtësinë, Gjesti gëzon një respekt dhe mbështetje të madhe morale nga kolegët e tij të skenës, të cilët kërkojnë mirëkuptim për “të vërtetën” e çdo artisti.
https://www.kosovarja-ks.com/wp-content/uploads/2026/03/tayna.mp4
