Të shikuarit e natyrës mund t’i ndihmojë njerëzit të ndiejnë më pak dhimbje, sipas një studimi të ri.
Studimi i neuroimazherisë, i udhëhequr nga një ekip nga Universiteti i Exeter-it dhe Universiteti i Vjenës, zbuloi se njerëzit që shikonin peizazhe natyrore përjetonin më pak dhimbje sesa ata që shikonin skena urbane ose zyra të mbyllura.
Universiteti i Exeter-it raportoi se 49 pjesëmarrësve iu dhanë impulse të vogla elektrike për të simuluar dhimbjen, ndërsa shikonin video të ndryshme si pjesë e kërkimit të kryer në Austri.
Dr. Alex Smalley, bashkautor i studimit, tha se shpresohej që rezultatet do të shërbenin si “dëshmi e re për rëndësinë e mbrojtjes së mjediseve të shëndetshme dhe funksionale natyrore”.
Potenciali shërues i natyrës
Universiteti i Exeter-it tha se kërkimi, i publikuar në revistën Nature Communications, përdori një skaner të rezonancës magnetike funksionale (fMRI).
Gjatë shikimit të videove me peizazhe natyrore, pjesëmarrësit raportuan më pak dhimbje dhe skanimi tregoi ndryshime në përgjigjet e caktuara të trurit të lidhura me përpunimin e dhimbjes.
Dr. Smalley shtoi: “Ky studim nxjerr në pah se takimet virtuale me natyrën mund të sjellin potencialin shërues të saj për njerëzit që nuk kanë mundësi të dalin jashtë.”
Ai theksoi se studimi do të hapë rrugë të reja për të kuptuar më mirë se si natyra ndikon në mendjen e njeriut.
Përmirësimi i menaxhimit të dhimbjes
Studenti i doktoraturës në Universitetin e Vjenës, Max Steininger, autori kryesor i studimit, tha se gjetjet sugjerojnë se efekti lehtësues i natyrës ndaj dhimbjes është i vërtetë, por rreth “gjysma e efektit të qetësuesve të dhimbjes”.
“Personat që kanë dhimbje duhet padyshim të vazhdojnë të marrin çdo medikament që u është përshkruar,” tha Steininger.
“Por shpresojmë që në të ardhmen mënyra alternative për të lehtësuar dhimbjen, si përjetimi i natyrës, të mund të përdoren për të përmirësuar menaxhimin e saj.”/BBC – Syri.net
