Koha e pritjes për zbulimin e kancerit të prostatës mund të shkurtohet ndjeshëm me një test 20-minutësh ‘jashtëzakonisht premtues’, sipas shkencëtarëve. Testi i ri me ultratinguj mund të zbulojë shumicën dërrmuese të tumoreve dhe kërkon një pjesë të vogël të kohës që kërkohet për metodat ekzistuese, si analizat e gjata të gjakut dhe rezonancat magnetike.
Rreth 3400 burra në Skoci marrin një diagnozë të kancerit të prostatës çdo vit. Por një ekip në Universitetin Heriot-Watt të Edinburgut tha se testimet e fundit në Spitalin Western General të qytetit kanë dhënë rezultate premtuese. Testi i ri përdor një ngjyrues, i cili përmban mikroflluska, që injektohet në një venë.
Kjo udhëton drejt prostatës ku një ultratingull me rezolucion të lartë mund të përcaktojë si rrjedhin mikro-flluskat. Çdo kancer në prostatë ndryshon fluksin e gjakut. Testet e hershme klinike tregojnë se ky test mund të zbulojë 94 për qind të tumoreve të prostatës dhe kushton një të dhjetën e rezonancave magnetike. Ai gjithashtu mundëson biopsi më të sakta të prostatës dhe terapi të shënjestruar për të shkatërruar qelizat e kancerit.
Metoda aktuale e testimit, një analizë gjaku e quajtur testi i antigenit specifik të prostatës (PSA), është e pasaktë dhe dërgon burrat në rezonanca të kushtueshme magnetike, të cilat mund të kenë lista të gjata pritjeje.
Dr. George Papageorgiou, drejtori ekzekutiv i zhvilluesve të testit Less Grey Imaging, tha se teknika e re ka potencialin ‘për të zbuluar në mënyrë të besueshme kancerin e prostatës klinikisht të rëndësishëm’.
Ai shtoi: ‘Aktualisht, diagnostikimi i kancerit të prostatës ndryshon gjerësisht nëpër vend, me shumë pacientë që diagnostikohen tepër vonë për trajtim kurativ. Duke integruar më shumë ultratingujt në rrugën diagnostike, mund të sigurojmë diagnostikim të hershëm. Urologët do të kenë një mjet imazherie që mundëson diagnoza të sakta dhe vendimmarrje më të shpejtë.’
Potenciali i teknologjisë ka bërë që grupi qeveritar Innovate UK t’i japë kompanisë një grant prej 370,000 sterlinash.
Profesori Alan McNeill, një kirurg urologjik këshillues në Western General dhe anëtar bordi i bamirësisë Prostate Scotland, tha: ‘Ky është kanceri më i zakonshëm tek burrat, por, nëse kapet herët ndërsa kanceri mbetet brenda prostatës, mund të kurohet në shumicën e rasteve.’
Gary Tait, kryetari i Grupit Mbështetës për Kancerin e Prostatës në Edinburgh & Lothian, tha: ‘Ne mbështesim plotësisht zhvillimin e kësaj teknologjie të re, e cila rrit mundësinë që më shumë burra të diagnostikohen dhe trajtohen më herët se tani.’ / Daily Mail – Syri.net
