Grupi i Rithemelimit ka zhvilluar një takim me demokratët pasditen e sotme në Rrëshen. Pjesë e këtij takimi ka qenë ish-kryetarja e Kuvendit, Jozefina Toppali.
Gjatë fjalës së saj, Topalli e cilësoi Shqipërinë si “Republika e grabitjes”. Ndër të tjera ajo u shpreh se është e pafalshme nëse shqiptarët nuk reagojnë për grabitjet që po bëhen në këtë vend, teksa përmendi edhe dosjen “5D”.
“Shqipëria është në emergjencë për demokraci për të ndryshuar. Ne nuk na falet nëse nuk reagojmë, sepse ne jetojmë në Republikën e 5D, ne jetojmë në qeverisjen e ministrave investitorëve strategjikë, ne jetojmë në Republikën e grabitjes. Ne jetojmë në një vend ku kanë ikur shumë të rinj. Edhe pushtuesi nuk i ka larguar shqiptarët sa kjo qeveri. Jetojmë në vendin ku Tirana nuk ka teatër, nuk ka teatër të kukullave.
Jemi popullsia që plakemi dy herë më shpejt se popullsitë e vendeve të tjera të botës. Bujqësia dhe blegtoria është në pikiatë, arsimi ka rënë shumë, duke humbur cilësinë e arsimit. Ne jetojmë në një vend, ku kryetari i opozitës është në arrest shtëpie, në një proces tërësisht politik. Dënimi ndaj ish-kryeministrit është marrë në natën e Vitit të Ri, besoj se është një urrejtje e pashembullt. Në një vend ku nuk ka drejtësi, pushteti bëhet bandë që vjedh. Ka rënë edhe drejtësia sociale, ka rënë shpresa e liria. Ky regjim mund të shembet, mjafton që të jemi bashkë”, u shpreh Topalli.
