Presidenti amerikan Donald Trump po analizon disa skenarë veprimi ndaj Iranit, përfshirë edhe mundësinë e një ndërhyrjeje ushtarake, pas shtypjes së përgjakshme të protestave nga regjimi iranian. Lajmi është raportuar nga CNN, duke cituar zyrtarë amerikanë.
Sipas burimeve, Trump është informuar për plane që parashikojnë goditjen e forcave iraniane të sigurisë të përfshira në shtypjen e demonstratave, megjithatë ende nuk është marrë një vendim përfundimtar. Presidenti ka deklaruar se Irani ka shprehur gatishmëri për negociata, ndërsa shqetësimi i tij kryesor mbetet vrasja e civilëve.
“Udhëheqësit e Iranit duan të negociojnë. Janë lodhur duke u përballur me Shtetet e Bashkuara. Irani dëshiron të negociojë me ne”, u shpreh Trump.
Megjithatë, brenda administratës amerikane ka shqetësime se një veprim ushtarak mund të ketë efekt të kundërt, duke bashkuar popullin iranian rreth regjimit dhe duke nxitur kundërpërgjigje ushtarake.
Duke folur për gazetarët në bordin e Air Force One, Trump tha se situata po merret shumë seriozisht dhe se ushtria amerikane po shqyrton “mundësi shumë të forta”, të cilat, sipas tij, do të zbatohen me vendosmëri nëse merret vendimi.
Përveç ndërhyrjes ushtarake, Shtetet e Bashkuara po vlerësojnë edhe alternativa të tjera, si sulme kibernetike, sanksione të reja ekonomike dhe mbështetje teknologjike për protestuesit, përfshirë sigurimin e aksesit në internet përmes shërbimit Starlink. Trump tha se mund të kontaktojë Elon Musk për këtë çështje pas rikthimit në Uashington.
/tiranapost
