Darka është vakti i fundit i ditës dhe ka një ndikim të drejtpërdrejtë në cilësinë e gjumit dhe funksionimin e organizmit gjatë natës. Zgjedhja e ushqimeve të gabuara në këtë vakt mund të çojë në probleme me tretjen, si fryrja dhe ndjesia e rëndesës, duke ndikuar negativisht në pushimin e natës.
Fryrja e stomakut është një ndër shqetësimet më të zakonshme pas darkës, dhe shpesh vjen si rezultat i konsumit të tepruar të fibrave, konstipacionit, sindromës së zorrës së irrituar apo ushqimeve të fermentuara. Disa ushqime që konsumohen shpesh në mbrëmje, si mishi i kuq me yndyrë, ushqimet pikante dhe disa perime si brokoli, lulelakra dhe lakrat e vogla, kanë tendencën të shkaktojnë grumbullim gazi dhe fryrje.
Mishi i kuq me përmbajtje të lartë yndyre tretet ngadalë dhe rëndon stomakun, ndërsa kripa favorizon mbajtjen e lëngjeve në organizëm. Ushqimet pikante, për shkak të përbërësve të tyre aktivë, ndikojnë në fermentim dhe çrregullojnë tretjen, ndërkohë që disa perime përmbajnë karbohidrate komplekse që nuk përpunohen lehtë nga sistemi tretës, duke krijuar gazra të shumtë.
Për të shmangur këto shqetësime, rekomandohet përfshirja e ushqimeve që ndihmojnë në qetësimin e stomakut dhe përmirësimin e tretjes. Frutat si kivi dhe banania, të pasura me fibra, ndihmojnë në lëvizjen e zorrëve dhe reduktojnë konstipacionin. Çaji i nenexhikut dhe xhenxhefili kanë veti qetësuese për muskujt e traktit tretës dhe ndihmojnë në nxjerrjen e gazrave. Kefiri, i pasur me probiotikë, përmirëson florën bakteriale të zorrëve, ndërsa pjepri ndihmon në largimin e ujit të tepërt dhe lehtëson ndjesinë e fryrjes.
Zëvendësimi i ushqimeve të rënda me alternativa më të lehta dhe ndihmuese për tretjen mund të bëjë një ndryshim të madh në shëndetin e stomakut dhe cilësinë e gjumit.
