Ministri në detyrë i Shëndetësisë, Arben Vitia ka konfirmuar se është intervistuar nga Prokuroria Speciale, por detaje të këtij intervistimi nuk ka dhënë.
Pas vizitës që sot i bënë Odës së Mjekëve të Kosovës bashkë me kryeministrin në detyrë, Albin Kurti, Vitia tha se arsyet e intervistimit do të sqarohen nga Prokuroria Speciale dhe vetë ai.
Vitia: Do të sqarohet nga Prokuroria pse u intervistova
“Do të sqarohet kjo edhe nga Prokuroria Speciale edhe nga ana ime”, deklaroi Vitia.
Sa i përket aktvendimit të Gjykatës Kushtetuese që rrëzoi disa ligje për arsye administrative, e ku ishte i përfshirë edhe ligji për Sigurim të Detyrueshëm Shëndetësor, ministri në detyrë i Shëndetësisë, Arben Vitia këtë vendim të kushtetueses e quajti të gabuar.
Ai tha se menjëherë pas konstituimit të Kuvendit të Kosovës do ta procedojnë përsëri ligjin në fjalë.
Vitia: Do ta procedojmë përsëri në Kuvendin ligjin për Sigurime Shëndetësore
“Unë mendoj që nuk ka pasur të bëjë me ligjin e sigurimeve shëndetësore perse, ka qenë një aktvendim që ka pasur të bëjë me anulimin po them kështu kushtimisht të disa ligjeve për shkaqe administrative siç thonë ata. Mendoj që ka qenë e gabuar natyrisht prej këndvështrimit tim, në kuptimin se nuk kanë pasur vërejtje në ligjin për sigurime shëndetësore si i tillë qysh e kemi prezantuar ne, i domosdoshëm për t’u implementuar Fondi i Sigurimeve Shëndetësore. Sepse po dëgjoj nga disa që është ligji nga viti 2013-2014 dhe vetëm është dashur të nuk qëndron ajo… Ne e kemi ndryshuar. Domethënë lajmi i keq, por tash menjëherë pas konstituimit të Kuvendit të Republikës do të procedojmë me hapat njësoj duke dërguar sa më shpejt në Kuvendin e Republikës për të proceduar sa më shpejt me këtë ligj që i hap rrugën edhe ligjore, pastaj edhe teknike logjistike, formimit të Sistemit Informativ Shëndetësor fillimisht e pastaj edhe Fondit për Sigurime Shëndetësore”, ka thënë ai.
Lidhur me ndërtimin e spitalit të ri gjinekologjik, Vitia tha se tashmë e kanë të konfirmuar nga Emiratet e Bashkuara Arabe se mjetet janë ndarë dhe se do të ndërtohet ngjitur me Klinikën e Fëmijëve.
Vitia: E kemi të konfirmuar se mjetet janë ndarë
“Tash jemi në një fazë shumë të avancuar. Domethënë, kemi konfirmim që ato veç janë ndarë dhe ideja është që të ndërtohet pothuajse ngjitur me spitalin pediatrik tashmë modern dhe përmes korridoreve të ngrohta të komunikojnë ashtu siç bëjnë edhe spitalet moderne në të gjithë botën”, ka deklaruar ministri në detyrë.
Për mungesën e mjekëve gjatë orarit të punës për shkak të sektori privat, Vitia tha se Inspektorati Shëndetësor ka shqiptuar gjoba dhe qindra masa disiplinore përfshirë edhe për ikje nga vendi i punës.
Vitia: Janë shqiptuar e dhjetëra e qindra masa disiplinore ndaj secilit që ik nga vendi i punës
“Ky fenomen vazhdimisht përsëritet e rregullohet me inspektimin që bëhet nga Inspektorati Shëndetësor. Për informacionin e juaj, ky vit që kaloi, domethënë 2025-ta, është një vit rekord i inspektimeve nga Inspektorati Shëndetësor. Dhe janë shqiptuar me dhjetëra e me qindra masa disiplinore ndaj secilit të i cili ka pasur janë gjet ose trajtime të pandërgjegjshme, ose ikje nga vendi i punës, ose mospërmbushje të kritereve të përcaktuara me ligjet e aplikuara”, tha ai.
