Shkencëtarët kanë arritur në një zbulim të rëndësishëm mbi sekretin e shijes së çokollatës. Sipas një studimi të publikuar nga The Guardian, është identifikuar një përbërës kyç që lidhet me mikrobet dhe kërpudhat e përfshira në procesin e fermentimit të kokrrave të kakaos, të cilat ndikojnë drejtpërdrejt në aromën dhe cilësinë përfundimtare të produktit.
Përmes sekuencimit gjenetik, studiuesit zbuluan nëntë mikrobe të afta të bashkëveprojnë për të prodhuar notat karakteristike të kakaos. Kur këto mikrobe u përdorën në kokrra kakaoje sterile, rezultati ishte një shije më e pasur, me nuanca lulesh, frutash dhe agrumesh, por me më pak aciditet dhe hidhësi. “Unë e quaj salca sekrete,” tha studiuesi Salt, duke theksuar rëndësinë e këtij zbulimi.
Sipas ekspertëve, ky rezultat mund të ketë ndikime të mëdha për fermerët e kakaos. Ata mund të inkurajojnë praninë e mikrobeve kyçe gjatë fermentimit, duke siguruar një produkt më cilësor dhe më aromatik. Një përfitim tjetër lidhet me tregun botëror: nëse prodhohet më shumë kakao me cilësi të lartë, nevoja për sasi të mëdha në procesin e prodhimit do të reduktohej, duke ndikuar kështu në uljen e çmimeve aktualisht të larta të çokollatës.
Gjithashtu, zbulimi hap mundësi për krijimin e aromave krejtësisht të reja, që normalisht nuk gjenden në kakaon tradicionale. “Mund të futni inokulume që do të nxirrnin shije të reja ose të dizajnoni strategji për të drejtuar fermentimin drejt krijimit të aromave unike”, shpjegoi Salt.
Ky revolucion shkencor mund të ndryshojë jo vetëm industrinë e çokollatës, por edhe jetën e miliona konsumatorëve që e shijojnë atë çdo ditë.
