Ish-presidenti rus dhe Nënkryetari i Këshillit të Sigurimit të Rusisë, Dmitry Medvedev, ka paralajmëruar se veprimet e Polonisë mund të çojnë në një konfrontim të drejtpërdrejtë me Rusinë dhe Bjellorusinë dhe të nisë Luftën e Tretë Botërore.
“Ngritja ushtarake e vetë Polonisë dhe prania ushtarake polake në Ukrainë mund të shkaktojnë një konfrontim të drejtpërdrejtë midis Varshavës dhe Bjellorusisë dhe Rusisë”, tha Medvedev në një artikull për gazetën Rossyia .
“Në këtë rast, grupi aleat do të japë një përgjigje të përshtatshme për të parandaluar kërcënimet që rrjedhin nga ambiciet e liga të establishmentit polak”, theksoi ai.
Sipas mendimit të Medvedev, “veprimet e pamatura të Polonisë, nëse mbështeten me nxitim nga aleatët e saj të NATO-s, mund të kenë pasoja të rrezikshme për të gjithë botën.” “Dhe atëherë Polonia do të përmbushë rolin e ‘hienës së Evropës’ që nisi Luftën e Tretë Botërore,” vuri në dukje ai.
