Artur Llupa alias Robert Cani alias Luan Tabaku është arrestuar nga Policia e Shtetit në kuadër të kontrolleve që kanë nisur prej ditësh në gjithë vendin për operacionin policor të koduar “Sundimi i ligjit”, për kapjen e shtetasve të shpallur në kërkim.
Referuar njoftimit zyrtar, 56 vjeçari me banim në Elbasan rezulton se është dënuar me 4 vjet burgim për veprën penale “Shfrytëzimi i prostitucionit”.
“Në zbatim të planit të masave të hartuar në kuadër të megaoperacionit mbarëkombëtar “Sundimi i ligjit”, për kapjen e shtetasve të shpallur në kërkim, bazuar në informacionet e siguruara nga inteligjenca policore, për vendndodhjen e një shtetasi në kërkim, shërbimet e Komisariatit të Policisë Elbasan kapën dhe vunë në pranga shtetasin:
- Artur Llupa alias Robert Cani alias Luan Tabaku, 56 vjeç, banues në Elbasan.
Autoritetet gjyqësore shqiptare kanë njohur vendimin e autoriteteve gjyqësore italiane, për dënimin e këtij shtetasi, me 4 vjet burgim, për veprën penale “Shfrytëzimi i prostitucionit”. Nga ky dënim, 56-vjeçarit i kanë mbetur për të kryer në vendin tonë, 2 vjet burgim”, thuhet në njoftimin e Policisë së Shtetit.
Materialet procedurale i kaluan Prokurorisë së Elbasanit, për veprime të mëtejshme.
A ju ndihmoi ky artikull?PoJo
