Presidenti i SHBA-ve Joe Biden ka deklaruar se civilët që ndodhen në zonën e Rafah në Rripin e Gazës janë “të ekspozuar dhe të pambrojtur” dhe se duhet të mbrohen.
Izraeli duhet të bëjë përpjekje “të besueshme” për të mbrojtur më shumë se një milion palestinezë të strehuar në qytetin jugor të Gazës, tha ai. Rafah ka qenë nën sulme të rënda ajrore izraelite ditët e fundit, me një numër viktimash të raportuara.
Një mjek palestinez i tha BBC-së se njerëzit në Rafah po jetojnë me frikë. Javën e kaluar, kryeministri izraelit Benjamin Netanyahu njoftoi se kishte urdhëruar trupat të përgatiteshin për të zgjeruar operacionin e tij tokësor në Rafah . Shefi i OKB-së për të drejtat e njeriut Volker Türk tha se çdo sulm do të jetë “i tmerrshëm” dhe se shumë civilë “ka të ngjarë të vriten”.
Më shumë se gjysma e popullsisë prej 2.3 milionë banorësh të Rripit të Gazës tani janë grumbulluar në qytetin në kufi me Egjiptin, i cili ishte shtëpia e 250,000 njerëzve përpara se të shpërthente lufta midis Izraelit dhe Hamasit në tetor.
Shumë nga njerëzit e zhvendosur jetojnë në strehimore të improvizuara ose tenda në kushte të mjerueshme, me qasje të pakët në ujë të pijshëm ose ushqim të sigurt. Të dielën, ushtria izraelite tha se dy pengje meshkuj izraelito-argjentinas u liruan gjatë një bastisjeje në Rafah.
Presidenti Biden bëri thirrje përsëri për mbrojtjen e civilëve të Rafahut pas takimit të tij me Mbretin e Jordanisë Abdullah në Uashington të hënën.
Ai tha se çdo operacion i madh ushtarak në qytet “nuk duhet të vazhdojë pa një plan të besueshëm për të garantuar sigurinë” e atyre që jetojnë atje.
“Ata duhet të mbrohen. Dhe ne kemi qenë gjithashtu të qartë që në fillim, ne kundërshtojmë çdo zhvendosje të detyruar të palestinezëve nga Gaza.”
A ju ndihmoi ky artikull?PoJo
