Ministri i Drejtësisë, Ulsi Manja gjatë vizitës në Hagë u takua me personalitete të larta të Gjykatës Ndërkombëtare Penale (GJNP) dhe nënshkroi disa konventa ndërkombëtare.
Ministri Manja shprehu mbështetjen e vendit të tij për drejtësinë ndërkombëtare dhe theksoi rëndësinë e rolit të GJNP në përmirësimin e gjendjes së të drejtës ndërkombëtare. Ministri nënshkroi disa konventa, përfshirë Konventën për Marrëveshjet për Zgjedhjen e Gjykatës dhe Protokollin për Ligjin e Zbatueshëm për Detyrimet Ushqimore, duke treguar përkushtimin e Shqipërisë për zbatimin e drejtësisë ndërkombëtare
Në një postim në rrjetet sociale, Manja tha se, “vendimet e GJNP në jo pak raste kanë ndryshuar rrjedhën e ngjarjeve në vatra të caktuara të konflikteve ndërkombëtare dhe kanë sjellë paqe për njerëzimin”.
“Fondi i besimit, i krijuar për të kompensuar viktimat e krimeve ndërkombëtare krahas ndëshkimit penal të autorëve të tyre, i jep kësaj gjykate dimensionin e bërjes së një drejtësie të plotë ndërkombëtare”, theksoi Manja.
Ministri Manja u shpreh se “vizita në shtëpinë e drejtësisë në Hagë është përherë një mundësi reflektimi për një botë më të drejtë dhe pa konflikte”.
“Vendi ynë si mbështetës i Statutit të Romës dhe akteve të tjera ndërkombëtare në lidhje me krimet e luftës, gjenocidit, iu bashkua që në fillim kësaj iniciative dhe nesër bëhet shtet nënshkrues i Konventës Lubjanë-Hagë”, tha Manja.
Gjatë vizitës në Hagë Manja nënshkroi Konventën për Marrëveshjet për Zgjedhjen e Gjykatës dhe Protokollin për Ligjin e Zbatueshëm për Detyrimet Ushqimore, në prezencë të Christophe Bernasconi, Sekretar i Përgjithshëm i Byrosë së Përhershme për të Drejtën Ndërkombëtare Private (HCCH) dhe Jules van Eijndhoven, nga Ministria e Punëve të Jashtme holandeze.
A ju ndihmoi ky artikull?PoJo
