“Kam firmosur të fundit dy ditë më parë”, shpreh me keqardhje Domenico Crisarà, president i Shoqatës Mjekësore të Padovës. Kur thotë “kam firmosur” i referohet certifikatave të “sjelljes së mirë” (një emërtim i gabuar, por jep një ide) sipas të cilës një profesionist mund të kërkojë status të mirë nga Ministria e Shëndetësisë, pra kartën e integritetit profesional për të shkuar jashtë vendit.
Presidenti i shoqatës së Mjekëve e ka tryezën të mbushur me formularë, kështu që firmos tre-katër në javë dhe çdo herë ndjen një dhimbje të pafuqishme duke parë ikjen e kolegëve të rinj, rrjedhjen e trurit, që largohen nga Italia pas diplomimit ose specializimit. Një fenomen që po rritet me shpejtësi.
Numrat e eksodit
Antonio Magi, presidenti i urdhrit më të madh mjekësor në Evropë, atij të Romës, me 145 mijë anëtarë, e ka “fotografuar” situatën duke kaluar nëpër shifra. “Në tre muajt e parë të vitit zyrat tona kanë lëshuar dokumentacionin e miratimit për 500 aplikantë. 90% janë të rinj nga 35 deri në 40 vjeç. Nëse kjo vazhdon, në vitin 2024 do të humbasim pothuajse 20,000 mjekë në nivel kombëtar”.
Filippo Anelli, presidenti i federatës kombëtare që mbledh të gjitha urdhrat provincialë thotë: “Shpresoj që këto parashikime të jenë të gabuara. Fatkeqësisht është realiteti. Tani mjekët e rinj nuk protestojnë më. Ata largohen dhe kaq. Na duhet një ndërhyrje e jashtëzakonshme në profesion, sesa të punojmë në listat e pritjes. Më mirë të ndërhyhet për shkakun sesa të vraponi për t’u mbrojtur me masa ndaluese.”
Sipas Anellit, nëse kushtet e punës do të ishin më të mira, nuk do të kishte nevojë të largoheshin nga repartet e spitalit. Po ku shkojnë këta mjekë që largohen nga Italia?
Izraeli, Shtetet e Bashkuara, Gjermania, Franca, Mbretëria e Bashkuar, Zvicra, Belgjika, Suedia, Kanadaja dhe Irlanda janë dhjetë vendet në krye të listës së destinacioneve të preferuara për mjekët që ikin.
Sipas të dhënave të raportuara nga sindikata Sumai në një botim të botuar në fillim të vitit 2024, 21.397 kanë shkuar jashtë vendit nga viti 2019 deri në 2021, duke përfshirë 14.341 specialistë (përjashtuar ata që janë larguar për arsye studimi).
/tiranapost
