Kur përpiqemi të bëhemi ekspertë në një fushë të caktuar, shpesh thuhet se na duhen 10,000 orë praktikë. Kjo praktikë duhet të jetë intensive dhe e vështirë, duke synuar zhvillimin tonë, për ta kthyer dobësinë në një aftësi.
Truri mund të përballojë vetëm 4-5 orë të kësaj praktike çdo ditë, gjë që do të thotë se duhen 10 vjet për t’u bërë ekspertë në një fushë të caktuar. Një kohë relativisht e gjatë, apo jo?
Por kjo mënyrë është e mirë vetëm nëse dëshironi të bëheni violinistë koncertesh, shkrimtarë apo mjeshtra në shah. Për shumë prej nesh, perspektiva e përkushtimit të 10,000 orëve për një gjë të vetme është frikësuese, në mos e pamundur. Një pjesë e madhe nuk kanë kohë të shpenzojnë një dekadë për një gjë të vetme. Shumë profesione sot kërkojnë një gamë të gjerë aftësish, duke e bërë të panevojshme përkushtimin e 10,000 orëve për një aftësi të vetme.
Në shumë fusha, nuk kemi nevojë të arrijmë statusin elitar; na duhet përkushtim dhe dije. Dhe për të arritur këtë na duhen shumë më pak se 10,000 orë. Kjo është logjika prapa rregullit të ri që po merr zhvillim kohët e fundit: rregulli i “100 orëve”.
Për shumicën e disiplinave, duhen vetëm 100 orë mësim aktiv për t’u bërë më të mirë sesa një fillestar. Rregulli i 10,000 orëve bazohet në arritjen e më të mirës; kërkon një sasi të madhe praktike (dhe ndoshta talent të lindur) për të arritur në 1% më të mirë në një fushë të caktuar.
Por duhen vetëm 100 orë për të kaluar nga mosdija në dijen më të madhe sesa 95% e popullatës—mjaftueshëm për të bërë një dallim domethënës. Fitimi i dijeve në një fushë ende kërkon punë dhe praktikë të thellë, por kërkon vetëm 1% të orëve që duhen për t’u bërë ekspertë.
Po ju ndihmojmë pak me matematikën. Nëse punoni 1 orë në ditë, mund të mësoni një aftësi të re për 3 muaj. Nëse punoni 5 orë në ditë, do t’ju duhen vetëm 3 javë. Nëse i përkushtoni fundjavat mësimit të një fushe të re, do t’ju duhen 10 javë.
Nuk do të jetë e lehtë, por është e mundur.
Çfarë prisni? Merreni atë kitaren që ka vite tek cepi i shtëpisë dhe kushtojini pak nga koha juaj çdo ditë. Sigurisht, kjo vlen edhe për mësimin e një gjuhe të re.
