Një studim i publikuar së fundmi nga Universiteti Charles Sturt në Australi ka treguar se përmbajtja “pro-anoreksi” në TikTok mund të ketë ndikime të dëmshme në perceptimin e trupit tek gratë e reja, madje edhe pas një ekspozimi të shkurtër. Studimi përfshiu 273 përdoruese femra të TikTok, të moshës 18 deri në 28 vjeç, të cilat nuk kishin çrregullime ushqimore të njohura më parë.
Në eksperiment, një grupi i tyre iu shfaq përmbajtje “neutrale” si video të natyrës, gatimit, kafshëve dhe klipe komedi, ndërsa grupi tjetër u ekspozua ndaj shtatë deri në tetë minuta përmbajtje që promovonte sjellje të çrregullta ushqimore, duke përfshirë kufizimin e ushqimit, bërjen shaka për sjellje të çrregullta dhe ndarjen e këshillave për humbje peshe.
Rezultatet e studimit, të botuara në revistën PLOS ONE, zbuluan se edhe një ekspozim kaq i shkurtër ndaj përmbajtjes “pro-anoreksi” ishte i mjaftueshëm për të shkaktuar një rritje të ndjeshme në pakënaqësinë me trupin dhe përvetësimin e standardeve joreale të bukurisë tek pjesëmarrëset. Sipas Dr. Rachel Hogg, pedagoge e lartë dhe një prej autoreve të studimit, kjo është veçanërisht shqetësuese duke marrë parasysh se shumica e përdoruesve të TikTok shpenzojnë shumë më tepër kohë në platformë çdo ditë, çka mund të çojë në ndikime negative afatgjata në perceptimin e tyre për trupin.
Një nga arsyet kryesore që studiuesit vendosën të fokusohen në TikTok është algoritmi i tij unik, i cili analizon sjelljen e përdoruesve dhe u shfaq atyre përmbajtje të përshtatur sipas preferencave të tyre. Algoritmi i TikTok nuk shfaq vetëm përmbajtje të njohura për përdoruesit, por gjithashtu i prezanton ata me tema dhe krijues të rinj, duke përzier përmbajtje të njohura me video nga llogaritë ose temat me të cilat përdoruesi nuk ka ndërvepruar më parë. Kjo do të thotë që dikush që thjesht shikon një video për përgatitjen e një vakti ose për një stërvitje në palestër, mund të ekspozohet papritur ndaj përmbajtjes “pro-anoreksi” në faqen e tyre “For You”.
Studimi gjithashtu thekson se problemi nuk është vetëm përmbajtja e dëmshme që mund të shfaqet, por edhe fakti se kjo përmbajtje shpesh shfaqet pa kërkesë të drejtpërdrejtë nga përdoruesi. Për më tepër, edhe grupi i kontrollit, i cili shikoi përmbajtje neutrale, përjetoi një ulje të kënaqësisë së imazhit të trupit, çka sugjeron se edhe vëmendja e shtuar ndaj pamjes së tyre për një periudhë të shkurtër kohore mund të ndikojë në perceptimin e tyre për veten.
Këto gjetje janë veçanërisht shqetësuese kur merren parasysh studimet që tregojnë se vajzat dhe gratë e reja raportojnë nivele më të larta të problemeve të shëndetit mendor krahasuar me djemtë, dhe se pakënaqësia trupore mund të kontribuojë ndjeshëm në këto probleme. Media sociale, me natyrën e saj të menjëhershme dhe sasiore të reagimeve, bashkë me imazhet e idealizuara që shfaqen, krijon një mjedis të rrezikshëm për përdorueset e reja, të cilat janë shpesh më të ndjeshme ndaj ndikimeve nga standardet e bukurisë që promovohen.
Në dritën e këtyre rezultateve, studiuesit theksojnë nevojën për ndryshime në mënyrën se si platforma si TikTok menaxhojnë përmbajtjen për të mbrojtur përdorueset nga efektet e dëmshme psikologjike. Euronews kontaktoi TikTok për një koment mbi këtë studim, por nuk mori një përgjigje të menjëhershme./BBC- Syri.Net
