Arkeologët kanë zbuluar një shkëmb gjigant në Amazonë që mban mijëra piktura të kafshëve me okër të kuqe që datojnë 12.500 vjet më parë. Është një zbulim që hedh dritë mbi mitologjitë dhe dietën e njerëzve të parë të rajonit.
Kodra Cerro Azul në Serrania de la Lindosa, Kolumbi është shtëpia e një serie të mahnitshme pikturash që përshkruajnë krijesa të ndryshme – kafshë, njerëz, kafshë që shndërrohen në njerëz dhe anasjelltas.
16 grupe dizenjosh në okër janë ngulitur në shkëmb. Sipas një studimi të ri të botuar në Journal of Anthropological Archeology, këto petroglife spektakolare demonstrojnë mitologjinë e pasur të vendasve të Amazonës.
Studiuesit vlerësuan mbetjet e kafshëve të gjetura nga vendet e afërta dhe i referuan ato me krijesat e përshkruara në petroglife.
Ata u fokusuan në detaje në gjashtë grupe vizatimesh, nga një që kishte përmasa 40 me 10 metra dhe përmbante mbi 1000 imazhe, deri në një grup shumë më të vogël prej 60 metrash katrorë me 244 vizatime të ruajtura mirë. Në total, studiuesit regjistruan më shumë se 3200 imazhe të pikturuara në shkëmb, shumica e të cilave lidhen me kafshë si dreri, zogjtë, derrat, hardhucat, breshkat, etj.
Dieta dhe ritualet
Ata zbuluan se banorët e lashtë të Amazonës kishin një dietë të larmishme që përfshinte peshq, një sërë gjitarësh të vegjël dhe të mëdhenj, si dhe zvarranikë të tillë si, gjarpërinjtë apo edhe krokodilët. Ndërsa peshqit u gjetën me bollëk në mbetjet arkeologjike, pamja e tyre në petroglife ishte e kufizuar në vetëm dy grupe dizajnesh.
Meqenëse përmasat e eshtrave të kafshëve nuk përputhen me paraqitjen e kafshëve në petroglife, shkencëtarët dyshojnë se artistët nuk po pikturonin thjesht atë që hanin. Gjithashtu u vu re mungesa e maceve të mëdha në piktura, pavarësisht statusit të tyre si grabitqarë kulminantë në rajon.
“Kuadri demonstron kompleksitetin e marrëdhënieve të njerëzve të Amazonës me kafshët, si burim ushqimi dhe si qenie të nderuara, të cilat kishin lidhje të mbinatyrshme dhe kërkonin negociata komplekse nga ekspertët rituale,” tha bashkëautori i studimit Mark Robinson nga Universiteti i Exeter në. MB.
Disa figura që kombinojnë tiparet e njeriut dhe të kafshëve aludojnë në një mitologji komplekse të transformimit midis statusit të kafshës dhe njeriut, një besim që ekziston ende në komunitetet moderne të Amazonës./ CNN.gr
/rtsh.al/
