Zgjedhjet e shëndetit dhe stilit të jetesës së njerëzve më të moshuar në botë nuk duhet të merren si një plan për jetëgjatësinë për të tjerët, ka paralajmëruar Richard Faragher, profesor i biogerontologjisë në Universitetin e Brighton-it në Mbretërinë e Bashkuar.
Sipas shkencëtarit, ende debatohet pyetja se pse disa njerëz jetojnë deri në 100 dhe disa jo. Shumica e ekspertëve theksojnë fatin ose gjenetikën e mirë si arsyet e mundshme të jetëgjatësisë. Megjithatë, ai theksoi se ekspertët bien dakord për një gjë, njerëzit që duan të jetojnë më gjatë nuk duhet “të marrin kurrë këshilla për shëndetin dhe mënyrën e jetesës nga një njëqindvjeçar”.
Paralajmërimi i tij vjen vetëm disa ditë pas vdekjes së gruas më të vjetër në botë, Maria Branyas Morera, e cila vdiq në gjumë në moshën 117-vjeçare me 19 gusht. Morera ia atribuoi jetëgjatësinë e saj “rregullit, qetësisë… mungesës së shqetësimeve, mungesës së keqardhjeve, pozitivitetit dhe qëndrimit larg njerëzve toksikë.” Vdekja e saj u parapri nga vdekja e burrit më të vjetër në botë, 114-vjeçarit Juan Vicente Perez Mora, këtë prill. Sekreti i një jete të gjatë të Morës ishte “të punonte shumë, të pushonte gjatë pushimeve, të flinte herët” dhe “të pinte një gotë aguardiente [një pije të fortë alkoolike] çdo ditë”.
Në një intervistë me The Guardian të publikuar të shtunën, Faragher tha se, ashtu si Morera dhe Mora, shumica e njëqindvjeçarëve nuk flasin për stërvitje apo dietë të shëndetshme kur komentojnë jetën e tyre të gjatë. Ai vuri në dukje se disa nga njerëzit më të vjetër në botë pranojnë se ishin duhanpirës dhe pinin alkool lirshëm, gjë që “bie në kundërshtim me shumë prova epidemiologjike që kemi për zgjatjen e jetëgjatësisë sonë”.
“Vetëm sepse i keni mbijetuar pirjes së 60 cigareve në ditë nuk do të thotë se pirja e 60 cigareve në ditë ju bën mirë… Fakti që njëqindvjeçarët bëjnë shumë nga këto gjëra të pashëndetshme dhe nuk i gjen gjë, do të thotë se ata janë ose me fat ose shumë në formë”, tha ai. Ai vuri në dukje se ideja se të kesh një pikëpamje pozitive mendore, të cilën Morera përmendi, mund të ndihmojë në promovimin e jetëgjatësisë mund të jetë një rast i shkakut të kundërt, pasi njerëzit priren të jenë më të qetë kur kanë shëndet të mirë.
“Kur ka qenë hera e fundit që keni pasur një qëndrim vërtet pozitiv mendor dhe dhimbje dhëmbi?” tha ai.
Pas vdekjes së Morerës, personi më i vjetër i gjallë në botë është bërë japonezi Tomiko Itooka, 116 vjeç, i cili ka lindur më 23 maj 1908, sipas Grupit të Kërkimeve Gerontologjike të SHBA. Personi më i vjetër që ka jetuar ndonjëherë ishte francezja Jeanne Louise Calment, e cila vdiq në vitin 1997 në moshën 122-vjeçare, sipas Librit Guinness./The Guardia – Syri.net
