Kolonel Çlirim Toci është shprehur se vizita e shefit të CIA-s në Ballkan, ka qenë e një rëndësie shumë të madhe.
Komente Toci i bëri përmes një lidhjeje për emisionin ‘Balkan Talks’ me gazetarin Franko Egro, në Euronews Albania, ku tha fjalimi i Vuçiç gjatë ditës së sotme mund të ketë qenë vazhdim i asaj që drejtori i CIA-s mund të ketë diskutuar me qeverinë serbe.
Ai tha gjithashtu se Kosova duhet ta investojë gjithë kapitalin e saj politik te krijimi i një shteti funksional dhe të njohur ndërkombëtarisht.
“Vizita e Shefit të CIA-s ishte një vizitë shumë e rëndësishme dhe vizitën e parë e bëri në Bosnjë. Edhe Beogradi e ka marrë mesazhin e Shefit të CIA-s të qartë. Edhe ajo që Vuçiç përmendi sot gjatë mesazhit të tij, mund të jetë edhe një vazhdim i asaj që drejtori i CIA-s e ka diskutuar me Vuçiç dhe drejtues të lartë të qeverisë serbe.
Prishtina duhet t’i lërë gjërat e vogla dhe të fokusohet te gjërat e mëdha. Prishtina duhet t’i fokusojë të gjitha kapitalet e saj politike në krijimin e një shteti funksional dhe të njohur nga ndërkombëtarët. Vizita e shefit të CIA-s në Ballkan tregon edhe njëherë për seriozitetin e administratës Biden, ndryshe nga serioziteti i BE. BE duket të ndjekë hapat e SHBA-ve”, tha Toci.
