Pjesë të një trupi të gjetur në një frigorifer të lënë pas në një shtëpi në Kolorado pasi u shit, i përkasin një vajze 16-vjeçare e cila u zhduk në vitin 2005, thanë autoritetet.
Vdekja e Amanda Leariel Overstreet, vajza biologjike e pronarit të mëparshëm të shtëpisë, po hetohet si një vrasje, sipas zyrës së sherifit që mbikëqyr rastin. Hetimet për vrasjen e adoleshentes janë ende në vijim.
Pjesët e trupit të 16-vjeçares u gjetën në janar pasi pronari i ri i një shtëpie pranë Grand Junction dhuroi një frigorifer që ishte lënë në shtëpi nga një qiramarrës i mëparshëm.
Personi që mori frigoriferin gjeti një kokë njeriu dhe parakrahë, tha Zyra e Sherifit të Qarkut Mesa, shkruan Guardian.
Adoleshentja nuk është parë qe nga prilli 2005 dhe “nuk ka asnjë të dhënë që Amanda Overstreet të jetë raportuar ndonjëherë e zhdukur”, thuhet në deklaratën e sherifit.
Shkaku i saktë i vdekjes nuk është përcaktuar ende dhe nuk është bërë asnjë arrestim, dhe vajza e zhdukur jetonte në zonat Grand Junction dhe Harris County, Teksas.
Sipas informacioneve të lëshuara nga një radio lokale, të dhënat tregojnë se shtëpia në rrugën ku u zbuluan eshtrat e 16-vjeçares i përkiste Bradley David Imer, i cili vdiq nga Covid-19 në vitin 2021. Gazeta raportoi se certifikata e vdekjes së Imer e listonte gruan e tij si Leanne Overstreet.
Radioja publike e Kolorados nuk mund të përcaktojë nëse Leanne Overstreet dhe Amanda Overstreet janë të lidhura. Por zyra e sherifit konfirmoi se nëna biologjike e Amanda-s ishte pronarja e mëparshme e shtëpisë ku u gjetën mbetjet.
Ndërkohë, Zyra e Sherifit të Qarkut Mesa lëshoi një deklaratë për Daily Mail duke konfirmuar se Leanne Overstreet ishte me të vërtetë pronarja e shtëpisë ku u gjetën eshtrat e vajzës së saj.
