Kërkim i ri sugjeron se puthja ka origjinë 21 milionë vjet më parë. Studiuesit sapo kanë hedhur dritë mbi një nga gjestet më universale dhe më enigmatike të botës së gjallë, puthjen.
Sipas një studimi të publikuar në Evolution and Human Behaviour dhe raportuar nga BBC, puthja, ajo prekje gojë më gojë që ne sot e lidhim me romantiken, mund të ketë rrënjë të thella evolutive, mbi 21 milionë vjet më parë.
Njerëzit e bëjnë, majmunët e bëjnë, madje edhe arinjtë polarë. Analiza e re tregon se një paraardhës i përbashkët i njerëzve dhe majmunëve të mëdhenj ka shumë gjasa ta ketë praktikuar këtë sjellje. Po aq intriguese është edhe ideja se neandertalët jo vetëm që puthnin, por mund të kenë shkëmbyer puthje edhe me njerëzit modernë.
Studiuesit janë marrë me këtë sjellje sepse, nga këndvështrimi evolucionar, puthja mbetet një mister i pastër. Nuk sjell përfitime të qarta mbijetese apo riprodhimi, dhe megjithatë shfaqet në mënyrë të pavarur në shumë specie.
Për të krahasuar sjellje të njëjta midis specieve, ekipi dha një përkufizim klinik, pothuajse brutal, të puthjes: kontakt gojë më gojë, jo agresiv, me lëvizje të buzëve ose pjesëve të gojës dhe pa shkëmbim ushqimi. Sipas tyre, me këtë standard, puthjet shihen te ujqërit, qentë e prerive, arinjtë polarë, madje edhe te albatrosët.
Dr. Matilda Brindle nga Universiteti i Oksfordit, e cila udhëhoqi kërkimin, shpjegoi se njerëzit, shimpanzetë dhe bonobot puthin, një nënkuptim i drejtpërdrejtë se paraardhësi i tyre i përbashkët duhet ta ketë pasur këtë sjellje. Sipas saj, kjo e vendos origjinën e puthjes tek primatët e mëdhenj rreth 21.5 milionë vjet më parë.
Pjesa tjetër e mozaikut evolutiv lidhet me neandertalët. Përveç sjelljeve të ngjashme, një studim i mëparshëm ka zbuluar se njerëzit modernë dhe neandertalët ndanin disa baktere orale, një provë e fortë se ka pasur shkëmbim të pështymës për qindra mijëra vite pas ndarjes së dy specieve.
Çfarë nuk zgjidh ky studim? Arsyeja pse puthim. Ka teori të shumta: disa thonë se puthja lindi si zgjerim i “krehjes” sociale të majmunëve, të tjerë sugjerojnë se mund të ketë funksionuar si një mënyrë intime për të vlerësuar shëndetin dhe përputhshmërinë e partnerit.
Dr. Brindle thekson se është koha të heqim dorë nga ideja se puthja është thjesht një “gjë romantike njerëzore”. Sipas saj, kjo sjellje është pjesë e bagazhit tonë evolucionar dhe një dritare e çmuar për të kuptuar më mirë veten dhe të afërmit tanë në botën e kafshëve.
