2
Qindra banorë të Hong Kongut janë mbledhur këto ditë në një dyqan të vogël e të vjetër për t’i dhënë lamtumirën “mbretit të çadrave”.
Yau Yiu-wai, 73 vjeç, i cili e ka kaluar jetën duke riparuar çadra, ka njoftuar se do të dalë në pension dhe biznesi i tij familjar do të mbyllë dyert përgjithmonë në fund të këtij viti.
Një histori që nisi në vitin 1842
Dyqani “Sun Rise Company” nuk është thjesht një biznes, por një trashëgimi që daton që nga viti 1842 (gjatë Dinastisë Qing). I themeluar fillimisht në Guangzhou të Kinës, biznesi u zhvendos në Hong Kong pas trazirave të luftës.
Familja Yau e ka mbajtur dyqanin gjallë për pesë breza radhazi.
“Kemi mbajtur lart emrin e familjes për 183 vite. Më vjen keq para paraardhësve të mi që po e mbyll, por koha na mundi”, tha pronari aktual, Yau.
Pse po mbyllet dyqani?
Arsyet e mbylljes janë një pasqyrim i ndryshimeve të kohës.
Blerjet online: Konsumatorët e sotëm preferojnë të blejnë çadra të lira në internet sesa t’i riparojnë ato cilësoret.
Mosha dhe shëndeti: Yau ka pësuar një goditje në tru para disa vitesh dhe e ka të pamundur të vazhdojë punën fizike.
Mungesa e mjeshtrit: Në të gjithë Hong Kongun kanë mbetur më pak se pesë mjeshtra që dinë të riparojnë çadra në mënyrë artizanale.
“Riparimi është përgjegjësi sociale”
Ndryshe nga shitësit e tjerë që duan që klientët t’i hedhin çadrat e prishura për të blerë të reja, Yau ka pasur një tjetër filozofi. Ai synonte që çadrat të zgjasnin sa më shumë.
“Këtë e bëj për mbrojtjen e mjedisit. Është përgjegjësi sociale“, thotë ai.
Për shumë banorë, çadrat që ai riparonte nuk ishin thjesht mjete kundër shiut, por kujtime familjare apo dhurata fejese që mbartnin histori dashurie.
Fundi i një epoke
Lajmi për mbylljen e dyqanit në lagjen Sham Shui Po u përhap shpejt në rrjetet sociale, ku shumë njerëz e cilësuan si një humbje të madhe për identitetin e qytetit.
Për banorët e moshuar, zhdukja e këtyre dyqaneve klasike ndihet si fundi i një epoke ku gjërat vlerësoheshin dhe riparoheshin, e nuk hidheshin menjëherë në plehra.
Mesazhi i fundit i “mbretit të çadrave” për klientët e tij besnikë ishte i thjeshtë.
“Më falni që nuk vazhdoj dot më… por ju lutem, mësoni të jeni miqësorë me mjedisin”, tha ai.
