Një aksident rrugor është regjistruar ditën e sotme në zonën e Liqenit të Thatë në Tiranë, ku një i ri që udhëtonte me motor është përplasur nga një automjet.
Sipas informacioneve paraprake dhe pamjeve nga vendi i ngjarjes, i riu ka mbetur i shtrirë në rrugë pas përplasjes, ndërsa është pritur mbërritja e ambulancës për t’i dhënë ndihmën e nevojshme mjekësore.
Ende nuk dihet gjendja e tij shëndetësore dhe shkalla e dëmtimeve të marra.
Në vendngjarje kanë mbërritur efektivët e Policisë, të cilët kanë nisur veprimet procedurale për dokumentimin e aksidentit dhe po punojnë për zbardhjen e shkaqeve dhe rrethanave të përplasjes.
Hetimet vijojnë për të përcaktuar përgjegjësinë e drejtuesve të mjeteve të përfshira në aksident.
