Ministri i Brendshëm Taulant Balla vizitoi sot në spital, qytetaren e aksidentuar një ditë më parë në Tiranë nga një automjet, që lëvizte me shpejtësi, i drejtuar nga një shtetas me shkelje të përsëritura të rregullave të qarkullimit rrugor.
Ministri Balla shoqërohej gjatë kësaj vizite nga drejtues e punonjës policie të Qarkullimit Rrugor, të cilët i uruan shërim të shpejtë, duke i dhuruar edhe një tufë me lule vajzës së aksidentuar.
Ministri u shpreh se “vajzat dhe djemtë e Policisë Rrugore të Tiranës nuk u gjendën dot që ta parandalonin këtë, por sigurisht janë këtu sot bashkë, për të të uruar të shkuara dhe shërim të shpejtë!“
Gjatë takimit me mjekët dhe kirurgët e spitalit, Balla mori një informacion të hollësishëm rreth gjendjes së vajzës.
Ndërkaq Policia e Tiranës ka vënë në pranga 21 vjeçarin Jorgaq Thengjillin, shoferi i cili aksidentoi këtë të dielë dy të rinj pranë Kryeministrisë.
Ky shtetas teksa ishte duke drejtuar automjetin e tij ka humbur kontrollin për shkak të shpejtësisë dhe ka përplasur dy këmbësorët, shtetasit D. K., dhe K. D. të cilët ndodhen në spitalin e Traumës, nën kujdesin e mjekëve. Referuar njoftimit zyrtar të Policisë, bëhet me dije se Thengjilli iu nënshtrua dhe testit të alkoolit nga i cili rezultoi se gjatë momentit të aksidentit nuk ishte nën ndikimin e alkoolit, gjithashtu dhe as nën ndikimin e lëndëve narkotike.
Ndër të tjera mësohet se ky shtetas është ndëshkuar më herët për tejkalim shpejtësie në zona të banuara.
“Specialistët e Komisariatit të Policisë Rrugore Tiranë arrestuan shtetasin J. Th., 21 vjeç, banues në Tiranë, për veprën penale “Shkelja e rregullave të qarkullimit rrugor”. Ky shtetas, ditën e sotme, në rrugën “Ismail Qemali”, duke drejtuar automjetin, ka humbur kontrollin mbi drejtimin e automjetit, dyshohet për shkak të shpejtësisë mbi normat e lejuara, dhe ka aksidentuar shtetasit D. K., dhe K. D., të cilët si pasojë janë dëmtuar dhe ndodhen në spital, nën kujdesin e mjekëve.
Drejtuesi i automjetit i është nënshtuar testit me “Drager” dhe “AquilaScan” dhe ka rezultuar që nuk kishte konsumuar pije alkoolike, apo lëndë narkotike. Ky shtetas është ndëshkuar më përpara për mosrregullim shpejtësie në qendrat e banuara”, thuhet në njoftimin e Policisë.
Kujtojmë se aksidenti ndodhi mesditën e kësaj të diele pranë Kryeministrisë, në Tiranë. Automjeti “Mercedes Benz”, përplasi çiftin e të rinjve, ndërsa u bë me dije se njeri nga të rinjtë, vajza iu nënshtrua menjëherë një ndërhyrje kirurgjikale në spitalin e Traumës. Fatmirësisht me të ndodhur aksidenti një mjek rastiti në vendin e ngjarjes dhe i dha ndihmën e parë dy të rinjve.