Deputeti i Partisë Liberale Egjiptiane (PLE), Veton Berisha, ka bërë të ditur se është i gatshëm ta japë mbështetjen dhe nënshkrimin e tij për mbajtjen e një seance të jashtëzakonshme të Kuvendit të Kosovës, ku do të diskutohej situata në vend pas vendimit të 16 shtatorit nga Gjykata Speciale ndaj katër ish-drejtuesve të UÇK-së.
Berisha, i cili është deputeti i vetëm i PLE-së në Kuvend dhe përfaqësues i komunitetit egjiptian, ka thënë se në këtë situatë nevojitet “unifikim politik dhe institucional”.
Ai ka theksuar se për thirrjen e një seance të jashtëzakonshme nevojiten së paku 40 nënshkrime të deputetëve, ndërsa u ka bërë thirrje kolegëve të tij që ta mbështesin iniciativën.
Sipas Berishës, pas seancës mund të ndërtohet një rezolutë e përbashkët, përmes së cilës Kuvendi do të shprehte qëndrimin dhe mbështetjen për procesin e mëtejshëm gjyqësor.
Ai ka thënë se në këtë rezolutë mund të përfshihet edhe pritshmëria që Gjykata e Apelit ta rishqyrtojë dhe korrigjojë vendimin e 16 shtatorit, në përputhje me procedurat dhe standardet përkatëse ligjore.
Po ashtu, Berisha ka thënë se Kuvendi mund të shqyrtojë edhe veprime të tjera të mundshme, kushtetuese dhe ligjore, që janë në kompetencën e institucioneve të Kosovës.
“Unë jam i gatshëm ta jap nënshkrimin tim. Jo në emrin tim!”, ka shkruar Berisha.
