Hamasi i është përgjigjur një propozimi nga Egjipti dhe Katari, ndërsa negociatorët përpiqen të arrijnë një marrëveshje brenda ditëve të ardhshme që do të shoqëronte një pauzë në luftimet izraelite në Gaza.
Ndërkohë, banorët e Gazës po përballen me një kërcënim të tmerrshëm të urisë. Organizata Botërore e Shëndetësisë tha se kufizimet për dërgesat e ndihmave kanë bërë që 90% e fëmijëve nën moshën 2 vjeç të përjetojnë varfëri të rëndë ushqimore.
Agjencia kryesore e ndihmës e OKB-së nuk është e sigurt nëse do të jetë në gjendje të paguajë stafin e saj në mënyrë që ata të mund të dërgojnë ushqim për banorët e Gazës. Shumë vende e ndërprenë financimin kur disa punonjës të agjencisë u akuzuan se morën pjesë në sulmin e Hamasit të 7 tetorit.
SHBA, në një operacion të përbashkët me Jordaninë, hodhi përsëri vakte ushqimore nga ajri në enklavë të martën. Pentagoni tha se SHBA dhe partnerët e saj ndërkombëtarë po konsiderojnë gjithashtu një korridor detar për të çuar ndihma në Gaza. Aleati i SHBA-së, Izraeli vazhdon të pengojë pjesën më të madhe të dërgesave të ndihmave.
Forcat izraelite hapën zjarr ndaj njerëzve që prisnin ndihmë të hënën mbrëma në Gazën veriore, thanë dëshmitarët okularë për CNN të martën. Të shtënat ndodhën në qytetin e Gazës pak para mesnatës. Një gazetar lokal tha se kishte “zjarr sporadik”.
Hamasi tha të martën se nuk do të ketë “asnjë shkëmbim të burgosurish” nëse nuk ka një armëpushim të përhershëm në Gaza , tërheqje të trupave izraelite dhe hyrje të ndihmës në Rrip. Një udhëheqës i lartë i Hamasit akuzoi gjithashtu Izraelin për ngecje në arritjen e një marrëveshjeje. Negociatorët janë mbledhur në Kajro që nga e diela për bisedime mbi një marrëveshje, por Izraeli nuk dërgoi një delegacion, tha një zyrtar izraelit për CNN.
Presidenti i SHBA Joe Biden tha se një armëpushim i mundshëm “është në duart e Hamasit”. Ai e quajti marrëveshjen në tryezë një “ofertë racionale” dhe tha se izraelitët kishin rënë dakord për të. Sekretari amerikan i Shtetit Antony Blinken tha gjithashtu të martën se “është në dorë të Hamasit” të pranojë një “armëpushim të menjëhershëm” në Gaza.
A ju ndihmoi ky artikull?PoJo
