Një skelet i rrallë i Nanotyrannus, i mbiquajtur “Jodi”, u shit për 47,3 milionë dollarë në një ankand të Sotheby’s në Nju Jork të martën, duke tejkaluar ndjeshëm vlerën e tij të vlerësuar prej 6 deri në 9 milionë dollarësh.
Çmimi përfundimtar, duke përfshirë tarifat e ankandit, u raportua nga The New York Times. Identiteti i blerësit nuk u bë menjëherë i ditur.
Shitja e bëri Jodin fosilin e dytë më të shtrenjtë të dinosaurit të shitur ndonjëherë në ankand.
Rekordi mbahet nga një skelet i Tyrannosaurus rex, i njohur si „Gus”, i cili u shit për 50,1 milionë dollarë në Sotheby’s në korrik.
Jodi tejkaloi gjithashtu shumën prej 44,6 milionë dollarësh të paguar në vitin 2024 për „Apex”, një skelet pothuajse të plotë të Stegosaurus.
Ekzemplari, rreth 67 milionë vjeçar, ka një gjatësi prej 6 metrash (19,6 këmbësh), nga hunda deri te bishti, dhe një lartësi prej rreth 2,9 metrash (9,5 këmbësh) mbi bazamentin e ekspozimit.
Sipas Sotheby’s, skeleti përbëhet nga rreth 191 elemente kockore të fosilizuara, që i përkasin një kafshe të vetme, duke përfshirë një kafkë pothuajse të plotë, me 53 kocka, dhe rreth 50 dhëmbë në faza të ndryshme zhvillimi.
Jodi u zbulua në vitin 2019 nga blegtori i Montanës, Jodi Pierson, në një pronë private në Formacionin Hell Creek, pranë qytetit Jordan.
Një ekip i drejtuar nga paleontologu komercial Clayton Phipps e nxori fosilin nga toka po atë vit, përpara se ai të bëhej pjesë e një koleksioni privat në vitin 2021.
Skeleti ishte ekspozuar më parë në panairin e artit Frieze Masters në Londër, në vitin 2023, ku ishte identifikuar si një ekzemplar i ri i T. rex, një klasifikim që më vonë u vu në pikëpyetje nga kërkimet shkencore.
Debat prej dekadash mbi identitetin e dinosaurit
Për më shumë se tetë dekada, paleontologët kanë debatuar nëse Nanotyrannus përfaqësonte një dinosaur më vete apo ishte thjesht një ekzemplar i ri i Tyrannosaurus rex.
Një studim i publikuar në vitin 2025 arriti në përfundimin se Nanotyrannus ishte një grabitqar më i vogël, i një specieje të veçantë, që jetonte krahas T. rex pranë fundit të periudhës së Kretakut.
Studiuesit identifikuan më shumë se 150 dallime anatomike midis të dyve, përfshirë krahët më të gjatë të Nanotyrannus, kthetrat më të mëdha të duarve dhe numrin më të madh të dhëmbëve.
Dinosaurët e rritur të llojit Nanotyrannus arrinin një gjatësi prej rreth 5,5 metrash (18 këmbësh), më pak se gjysmën e gjatësisë së disa ekzemplarëve të rritur të T. rex.
Sotheby’s e përshkroi Jodin si një nga vetëm tre skeletet e Nanotyrannus të njohura nga shkenca dhe si të parin që del në ankand që kur kërkimet shkencore vërtetuan se kjo kafshë i përkiste një gjinie të veçantë.
Shitja ngre gjithashtu shqetësime lidhur me përfundimin e fosileve me rëndësi shkencore në koleksione private, gjë që mund të kufizojë aksesin e studiuesve dhe mundësitë për ekspozimin e tyre për publikun./AA
