SPAK ka dërguar për gjykim 17 të pandehur, mes tyre Emiljan Burba, Rexhep Rraja dhe Ervis Shuli, të akuzuar si drejtues dhe financues të një grupi të strukturuar kriminal të përfshirë në trafikimin ndërkombëtar të lëndëve narkotike.
Sipas SPAK, grupi dyshohet se trafikonte kokainë nga vendet e Amerikës Latine drejt Bashkimit Evropian, si dhe marijuanë nga Shqipëria drejt vendeve të ndryshme të Evropës dhe Turqisë.
Emiljan Burba, Rexhep Rraja, djali i ish-deputetit të Partisë Socialiste, dhe Ervis Shuli akuzohen për trafikim të lëndëve narkotike në kuadër të një grupi të strukturuar kriminal, si dhe për drejtimin e këtij grupi.
Të pandehurit e tjerë akuzohen, sipas roleve të përcaktuara nga hetimet, për trafikim të lëndëve narkotike dhe pjesëmarrje në grupin e strukturuar kriminal.
Për njërin prej tyre, Marvin Bushati, rëndon edhe akuza për mbajtje pa leje të armëve dhe municionit, pas sekuestrimit të tyre në banesë gjatë ekzekutimit të masës së sigurimit më 10 dhjetor 2025.
Sipas dosjes hetimore, aktiviteti kriminal përfshin tre episode kryesore të sekuestrimit të lëndëve narkotike në vende të ndryshme.
Më 3 nëntor 2020, autoritetet malazeze sekuestruan 1.722 kilogramë marijuanë, e cila ishte nisur nga Shqipëria me destinacion përfundimtar Gjermaninë.
Më 23 nëntor 2020, autoritetet holandeze sekuestruan 475 kilogramë kokainë në portin e Vlissingen, të dërguar nga Ekuadori.
Ndërsa më 26 janar 2021, autoritetet turke sekuestruan rreth 236 kilogramë marijuanë, të nisur nga Shqipëria me destinacion Turqinë.
Sipas SPAK, të pandehurit dhe bashkëpunëtorët e tyre kanë koordinuar aktivitetet përmes komunikimeve në platformën e enkriptuar Sky ECC. Këto komunikime janë administruar nga autoritetet franceze të drejtësisë, në kuadër të ndihmës së ndërsjellë juridike.
Dërgohen për gjykim:
- Emiljan Burba, Rexhep Rraja dhe Ervis Shuli, të akuzuar për kryerjen e veprave penale: “Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal, Kryerje e veprave penale nga organizata kriminale ose grup i strukturuar kriminal”, “Grup i strukturuar kriminal”, kryer në formën e drejtimit, parashikuar nga neni 333/a/1 i Kodit Penal.
- Bujar Sefa (alias Xaka, alias Lala), të akuzuar për kryerjen e veprave penale: “Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, më shumë se një herë, parashikuar nga nenet 283/a/2 dhe 28 pika 4 të Kodit Penal, në lidhje me nenin 334/1 të Kodit Penal, “Kryerje e veprave penale nga organizata kriminale ose grup i strukturuar kriminal”, “Grup i strukturuar kriminal”, kryer në formën e pjesëmarrjes, e parashikuar nga neni 333/a/2 i Kodit Penal.
- Marvin Bushati, i akuzuar për kryerjen e veprave penale: Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal, “Kryerje e veprave penale nga organizata kriminale ose grup i strukturuar kriminal”, “Grup i strukturuar kriminal”, kryer në formën e pjesëmarrjes, parashikuar nga neni 333/a/2 i Kodit Penal, “Mbajtja pa leje dhe prodhimi i armëve, armëve shpërthyese dhe i municionit” në banesë, të parashikuar nga neni 278/4 i Kodit Penal, të sekuestruar në banesë gjatë momentit të ekzekutimit të masës së sigurimit personal më datë 10.12.2025.
- Jani Çavo, Përparim Rraja, Gazmir Rraja, Sokol Qaja, Aldo Gjini (alias Iamandi), Bledar (alias Blerti) Cafi, Endrit (alias Indrit) Dokle, Zamir Aliaj (alias Çoku), të akuzuar për kryerjen e veprave penale: “Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal “Kryerja e veprave penale nga organizata kriminale ose grupi i strukturuar kriminal”, “Grup i strukturuar kriminal”, kryer në formën e pjesëmarrjes, parashikuar nga neni 333/a/2 i Kodit Penal,
- Islam Sefa (alias Xaka), Hajdar Sefa (alias Xaka, alias Lala), dhe Vidjan Baroka, të akuzuar për kryerjen e veprave penale: “Trafikim i lëndëve narkotike”, kryer në bashkëpunim në formën e veçantë të bashkëpunimit, atë të grupit të strukturuar kriminal, parashikuar nga nenet 283/a/1 dhe 28 pika 4 të Kodit Penal, në lidhje me nenin 334/1 të Kodit Penal “Kryerje e veprave penale nga organizata kriminale ose grup i strukturuar kriminal”.
- Agim Nina (alias Lorenc Selmani), i akuzuar për kryerjen e veprave penale: “Trafikim i lëndëve narkotike”, kryer në bashkëpunim, parashikuar nga neni 283/a/2 i Kodit Penal.
