Dega e Partisë Demokratike të Kosovës (PDK) në Kijevë të Malishevës i është drejtuar publikisht kryetarit të partisë, Bedri Hamza, me një kërkesë për rikthimin e Fatmir Limajt në radhët e PDK-së.
Në një qëndrim të bërë publik, struktura dhe mbështetësit e PDK-së në këtë degë theksojnë se kjo kërkesë bazohet në disa arsye politike dhe historike, duke vënë në pah kontributin e Limajt në luftën çlirimtare dhe në ndërtimin e institucioneve të Kosovës.
Sipas tyre, rikthimi i figurave me përvojë do të kontribuonte në fuqizimin e partisë dhe në rritjen e besimit qytetar, veçanërisht në një periudhë kur, siç theksohet në deklaratë, nevojitet më shumë unitet brenda spektrit politik që buron nga vlerat e Ushtrisë Çlirimtare të Kosovës.
Reagimi i plotë:
KËRKESË PUBLIKE NGA PDK KIJEVË
I nderuari kryetar Bedri Hamza,
Ne, si strukturë dhe mbështetës të Partia Demokratike e Kosovës në Kijevë, ndjejmë obligim që publikisht të shprehim qëndrimin tonë:
Kërkojmë që Fatmir Limaj të pranohet dhe të rikthehet në radhët e PDK-së.
Kjo kërkesë bazohet në disa arsye të rëndësishme:
Kontributi i tij i padiskutueshëm në luftën dhe ndërtimin e institucioneve të Kosovës, si pjesë e historisë së përbashkët politike me figura si Hashim Thaçi dhe Kadri Veseli.
Nevoja për bashkim dhe fuqizim të spektrit politik që buron nga vlerat e UÇK-së, në një kohë kur uniteti është më i domosdoshëm se kurrë.
Besimi se tejkalimi i dallimeve të së kaluarës dhe hapja ndaj bashkëpunimit krijon një PDK më të fortë, më gjithëpërfshirëse dhe më të gatshme për sfidat e ardhshme.
Rikthimi i figurave me përvojë dhe mbështetje qytetare kontribuon në rritjen e besimit dhe mobilizimin e elektoratit.
Ne besojmë fuqishëm se PDK është ndërtuar mbi sakrificë, unitet dhe vizion të përbashkët. Bashkimi i të gjithë atyre që kanë kontribuar për këtë parti e forcon edhe më shumë rrugën drejt fitoreve të reja.
Prandaj, kërkojmë që vendimet politike të reflektojnë frymën e bashkimit, respektit dhe fuqizimit të partisë në tërësi.
Me respekt,
PDK Kijevë
