Loja, lëvizjet e qëndrimet e qytetarëve tash e tutje do të jenë nën monitorim.
Nga të gjitha anët, nga kjo javë, parku në lagjen Kalabria në kryeqytet do të jetë nën mbikëqyrjen e Policisë së Kosovës.
Vendosja e tyre, u planifikua mes lokacioneve të reja që parashihen në fazën e dytë të monitorimit në Prishtinë.
Më shumë detaje për këtë projekt që nisi zbatimin këtë vit dha drejtori për Siguri dhe Emergjenca, Lulzim Fushtica.
“Parku i parë është parku dhe fusha sportive që është në lagjen “Kalabria” dhe do të vazhdohet me të gjitha parqet dhe fushat sportive të cilat janë vlerësuar se duhet të monitorohen, poashtu do të vendosen kamera edhe në parkun e Gërmisë, në parkun Arbëri dhe në parkun e Tokbahqës pra në të gjitha parqet”, ka theksuar për RTVDukagjinin, Lulzim Fushtica, drejtor për Siguri dhe Emergjenca.
Fushtica bëri të ditur se deri kur planifikohet të përfundoj vendosja e kamerave në parqe.
“Parqet si të tilla po planifikojmë të përfundojnë brenda këtij viti por pastaj do të ketë edhe një fazë në vitin e ardhshëm se kjo është një kontratë tre vjeçare por që faza e dytë mund të përfundoj edhe më herët por do të vendosen kamerat dhe risia është që do të vendosen edhe radarët mobil për mbatjen e shpejtësisë”, ka deklaruar ai.
Shumë shpesh sapo rinovohen ose vendosen, lodrat por edhe ulësa e të tjera hapësira në parqet publike dëmtohen, dhe tani me vendosjen e kamerave janë paralajmëruar masa ndëshkuese për personat që dëmtojnë hapësirat publike.
