Artan Tafani, i cili është kthyer bashkëpunëtori i drejtësisë ka zbardhur disa nga vrasjet e bujshme me pagesë në vend, për llogari të grupit të Laert Haxhiut.
Tafani ka zbardhur disa nga vrasjet e kryera në Elbasan, Korçë, Lushnje, Tepelenë dhe Greqi. Burime për media bëjnë me dije se konkretisht janë zbardhur 6 vrasje.
Tafani ka dëshmuar për vrasjen e Alban Semakut, Çajup Selimit, Albi Bashaliut, Fridmand Xhaferrajt, Lulzim Qorrit dhe Dikens Halilit. Sipas dëshmisë së të penduarit të drejtësisë, Haxhiu ka paguar për disa nga vrasjet Bledar Berberin, Mariglen Topuzin dhe Firdeus Berberin.
Vrasja e Dikens Halili
Dikens Halili 39 vjeç u ekzekutua në tetor të 2021. Ai ishte në një lokal në Athinë, kur një person i maskuar u fut brenda dhe e qëlloi me plumb në kokë. Halili ishte pronar i lokalit ku edhe u ekzekutua. Autori pas ngjarjes u largua me një makinë.
Atë kohë mediat greke raportuan se Halili ishte një person me precedent të mëparshëm penal dhe se vrasja kishte ndodhur për larje hesapesh
Vrasje e Alban Semaku
Alban Samaku u gjet i pajetë në Peqin me dy plumba në kokë më tetor të 2021. Alban Semaku, 38 vjeç, banues në Lushnje, njihet si një nga ish-anëtarët e bandës së Aldo Bares dhe si një person me precedentë të mëparshëm penal.
Të dhënat tregonin se Samakut i ishte ngritur kurth dhe se persona të njohur për të e kanë nxjerrë në pritë, ku më pas dyshohet se është ekzekutuar. Ai mendohet se është vrarë në një vend tjetër dhe më pas është hedhur në Peqin.
Vrasja e Çajup Selimit
Selimi 52 vjeç u vra në qershor të 2021. Ai u ekzekutua në hyrje të pallatit në “15 shtatori”. Ai u qëllua nga një person me armë zjarri. 52-vjeçari pasi u qëllua me armë u dërgua në Spitalin Rajonal të Gjirokastrës, por ndërroi jetë si pasojë e plagëve të marra. Policia vijon aksionin për kapjen e autorit.
Vrasja e Albi Bashaliut
Albi Bashaliu, 32 vjeç, mbeti i vdekur mëngjesin e 27 dhjetorit të 2021 në Gjoçaj të Peqinit. Ai u qëllua për vdekje me breshëri plumbash nga disa persona. Pak momente pas ngjarjes, autorët dogjën dhe makinën duke fshehur gjurmët.
Albi Bashaliu ishte i ulur brenda në lokal. Dikush e thirri në emër nga jashtë dhe sapo doli, 32 vjeçari u qëllua për vdekje.
Vrasja e Fridman Xhaferrajt
25-vjeçari Fridman Xhaferraj u dhunua barbarisht dhe më pas u vvra më 14 qershor të 2021. Trupi i të riut u gjet në ujërat e Rezervuarit të Gjançit në Korçë. Ai u dhunua barbaridht dhe më pas i lidhën duart duke e hedhur në rezervuar duke i marrë kështu edhe jetën.
Vrasja e Lulzim Qorrit
Lulzim Qorri u vra në dhjetor të 2018, pasi ju bë atentat. Qorri u vra në një lokal, teksa ishte duke konsumiar një kafe. Dy persona ndaluan para lokalit dhe e qëlluan me breshëri plumbash duke e lënë të vdekur.
