2
Kompania për Distribuimin e Energjisë Elektrike në Kosovë (KEDS) ka njoftuar se reshjet e mëdha të shiut dhe breshëri, të shoqëruara me erëra të fuqishme, kanë shkaktuar ndërprerje të energjisë elektrike në disa pjesë të vendit, me theks të veçantë në rajonin e Anamoravës.
Sipas KEDS-it, më të prekurat nga kjo situatë janë komuna e Gjilanit dhe rrethina e saj, ku një numër i konsiderueshëm konsumatorësh kanë mbetur pa energji. Kompania thekson se ekipet e saj janë të mobilizuara dhe po punojnë pa ndërprerje në terren për të rikthyer furnizimin me energji sa më shpejt që të jetë e mundur.
“Reshjet intensive dhe kushtet e pafavorshme atmosferike kanë prekur kryesisht rajonin e Anamoravës, por nuk kanë kursyer as pjesë të tjera të Kosovës. Ekipet tona janë në terren dhe po bëjnë përpjekje maksimale për të normalizuar situatën”, thuhet në njoftim.
Ndërkohë, sipas KEDS-it, rajonet e Pejës, Ferizajt dhe Prizrenit janë prekur në masë më të vogël, por ekipet janë gjithashtu duke ndërhyrë edhe në ato zona për të zgjidhur problemet që kanë lindur.
