Hailey Bieber duket se ka marrë frymëzim nga një prej ikonave më të mëdha të modës të viteve ’90, Carolyn Bessette Kennedy.
Modelja 29-vjeçare u shfaq në Londër me një fustan të gjatë, në ngjyrë champagne dhe me dekolte të theksuar, pothuajse identik me atë që Carolyn Bessette Kennedy kishte veshur në darkën e provave para dasmës së saj me John F. Kennedy Jr. në vitin 1996.
Hailey e veshi fustanin për një darkë në Harry’s Bar në Londër, duke e kombinuar me sandale metalike me rripa dhe bizhuteri minimale. Flokët e saj ngjyrë çokollatë ishin stiluar në onde të lirshme, duke i dhënë look-ut një pamje elegante dhe minimaliste.
Stilizimi u realizua nga Dani Michelle, e cila ndau në Instagram disa fotografi të Hailey-t me këtë veshje.
Fustani origjinal i Carolyn ishte krijuar nga stilisti Narciso Rodriguez, një mik i saj i afërt, dhe ishte pjesë e koleksionit pranverë/verë 1997 të Cerruti. Edhe fustani i dasmës së Carolyn me JFK Jr. ishte një krijim i Rodriguez.
Carolyn e kishte veshur fustanin në darkën e provave që u zhvillua në Greyfield Inn, në Cumberland Island, Georgia. Ndryshe nga Hailey, ajo kishte zgjedhur t’i mbante flokët bionde të mbledhura në një topuz elegant.
Vetë dasma e Carolyn Bessette dhe John F. Kennedy Jr. u zhvillua më 21 shtator 1996, po në Cumberland Island. Çifti zgjodhi një ceremoni sa më private, larg vëmendjes së mediave, dhe ftoi vetëm rreth 40 persona.
Dasma u organizua për rreth gjashtë muaj dhe kërkoi masa të jashtëzakonshme për të ruajtur sekretin. Ceremonia u mbajt në First African Baptist Church, një kishë e vogël me vetëm tetë stola prej druri.
Në darkën para dasmës, JFK Jr. ngriti një dolli për Carolyn dhe tha se ajo e kishte bërë “burrin më të lumtur në botë”.
Duke rikthyer një prej veshjeve të Carolyn Bessette Kennedy, Hailey Bieber duket se i është bashkuar listës së figurave të modës që vazhdojnë të marrin frymëzim nga stili i saj minimalist, dekada pas vdekjes së saj./Class
