Një kohëzgjatje optimale e gjumit lidhet me funksion më të mirë ekzekutiv të trurit dhe ka ndikim më të madh te personat me epilepsi fokale, sipas një studimi të publikuar më 22 prill në revistën Neurology.
Xin You Tai nga Universiteti i Oksfordit dhe kolegët analizuan të dhënat e studimit afatgjatë britanik U.K. Biobank për të shqyrtuar lidhjen mes gjumit, funksionit njohës dhe rrezikut për demencë. Studimi përfshiu mbi 482 mijë persona, të moshës 38 deri në 72 vjeç, pa demencë në fillim të studimit.
Rezultatet treguan se në të gjitha grupet, persona të shëndetshëm, pacientë me epilepsi fokale dhe ata me goditje në tru, gjumi optimal prej gjashtë deri në tetë orë lidhej me funksion më të mirë ekzekutiv. Megjithatë, te pacientët me epilepsi fokale, përfitimi nga gjumi i mirë ishte dukshëm më i madh se te personat e shëndetshëm.
Gjumi jo optimal u shoqërua me funksion më të dobët njohës deri në tetë vite para diagnostikimit të epilepsisë fokale.
Krahasuar me personat e shëndetshëm që flinin mirë, individët me epilepsi fokale dhe gjumë të dobët kishin rrezik shumë më të lartë për të zhvilluar demencë. Ky rrezik ishte më i ulët te pacientët me goditje në tru që kishin probleme me gjumin.
Studimi tregoi gjithashtu se përmirësimi i gjumit ul ndjeshëm rrezikun e demencës te personat me epilepsi fokale, ndërsa te pacientët me goditje në tru nuk u vërejt një ndryshim i madh.
Sipas studiuesve, gjumi i mirë mund të ketë një rol të rëndësishëm në mbrojtjen e funksionit të trurit dhe në uljen e rrezikut për demencë, veçanërisht te personat me epilepsi fokale.
Disa nga autorët e studimit deklaruan lidhje me industrinë farmaceutike. /Medicalxpress – Syri.net
